«Թեև Բարաք Օբամային բաժին ընկավ նախագահելու բավականին բարդ ժամանակահատված, նա բավականին լավ ղեկավարեց երկիրը և մեծ շանսեր ունի վերընտրվելու ԱՄՆ նախագահի պաշտոնում հաջորդ նախագահական ընտրություններին»,- մեզ հետ զրույցում ասում է Հայ ազգային կոնգրեսի մաս կազմող՝ Հայաստանի լիբերալ կուսակցության նախագահ Հովհաննես Հովհաննիսյանը՝ շնորհավորելով ԱՄՆ նախագահին ծննդյան 50-ամյակի առթիվ։
Բարաք Օբամայի վարչակազմի գործունեության ամենակարևոր արդյունքը, ըստ Հովհաննես Հովահննիսյանի, այն է, որ նախագահին հաջողվեց երկրի քաղաքականության առանցքը վերստին դարձնել մարդու իրավունքներն ու ժողովրդավարության հաստատումը։ «Սեպտեմբերի 11-ի ահաբեկչական ակտից հետո, Բուշի իր քաղաքականությունը սևեռեց ահաբեկչության դեմ պայքարին։
Մինչդեռ Օբամային հաջողվեց համոզել, որ առաջնայինը ժողովրդավարության հաստատումն է։ Դրանով է պայմանավորված նաև ԱՄՆ-ի ուշադրության մեծացումը Արևելյան Եվրոպայի, Հարավային Կովկասի երկրների հանդեպ»,- ասում է Հովհաննես Հովհաննիսյանը։