Վենեսուելայի նախագահ Ուգո Չավեսը համաձայնվել է Ռուսաստանի վարչապետ Վլադիմիր Պուտինի հետ առ այն, որ ԱՄՆ-ը համաշխարհային տնտեսության «մակաբույծն» է: Այս մասին նա հայտնել է Twitter միկրոբլոգերի կայքում: «Ես համաձայն եմ այն բանի հետ, ինչ ասվել է մեր ընկերոջ՝ Ռուսաստանի վարչապետ Վլադիմիր Պուտինի կողմից. Ամերիկան իսկական «մակաբույծ» է համաշխարհային տնտեսությունում», գրել է Չավեսը: «Այժմ բոլիվարական ռազմավարական առաջարկն առ այն, որ անհրաժեշտէ ստեղծել նոր արտարժույթ՝ սուքրե, ստանում է առանձնակի արժեք: Կորչի՛ դոլարի դիկտատուրան»,- գրել է նախագահը:
Հիշեցնենք, որ երկու օր առաջ Վլադիմիր Պուտինը, հանդիպելով երիտասարդության հետ, հայտարարել էր, որ ԱՄՆ-ն վարում է սխալ քաղաքականություն և որ այն, փաստորեն, «մակաբույծի» դեր է տանում համաշխարհային տնտեսության մեջ: Սրանից հետո եղան բազմաթիվ քննարկումներ, որոնցից ամենաուշագրավը Fox Business հեռուստաալիքի եթերում էր, երբ Պուտինին առաջարկեցին չբողոքել կապիտալիզմից, քանի որ դրա շնորհիվ նա դարձել է «միլիարդատեր և դիկտատոր»:
