ԱՄՆ նորընտիր նախագահ Ջո Բայդենի վարչակազմը մտադիր է հինգ տարով երկարաձգել Ռազմավարական հարձակողական զենքի հետագա կրճատման և սահմանափակման միջոցառումների մասին պայմանագիրը (ՍՏԱՐՏ-3): Այս մասին հաղորդում է The Washington Post-ը:
«Նախագահ Բայդենը ձգտում է Ռուսաստանի հետ մնացած միակ պայմանագիրը, որը սահմանափակում է աշխարհի երկու խոշորագույն միջուկային զինանոցները, երկարաձգել 5 տարով՝ դրա ժամկետի ավարտից ընդամենը մի քանի օր առաջ»,- ասվում է հաղորդագրությունում:
Որոշումը կապված է այն բանի հետ, որ փետրվարի 5-ին լրանում է Վաշինգտոնի կողմից պայմանագիրը երկարաձգելու ժամկետը:
Ռազմավարական հարձակողական զենքի հետագա կրճատման և սահմանափակման միջոցառումների մասին պայմանագիրը Ռուսաստանի և ԱՄՆ-ի կողմից ստորագրվել է 2010 թվականին: ՍՏԱՐՏ-3-ը կնքվել է տասը տարի ժամկետով: Ներկայումս Մոսկվան և Վաշինգտոնը բանակցություններ են վարում զենքի վերահսկման հետագա համակարգի շուրջ:
