ԱՄՆ-ի նախագահ Ջոզեֆ Բայդենը հունվարի 21-ին կստորագրի 10 հրամանագրեր կորոնավիրուսի համաճարակի դեմ պայքարի վերաբերյալ: Այդ մասին հայտնել է Reuters գործակալությունը՝ վկայակոչելով Միացյալ Նահանգների նոր վարչակազմի ներկայացուցիչների հայտարարությունը:
Հունվարի 20-ին պաշտոնն ստանձնած Բայդենը համավարակի դեմ պայքարը հայտարարել է մոտ ապագայում իր վարչակազմի գլխավոր առաջնահերթությունը՝ հաշվի առնելով այն հանգամանքը, որ երկրում ախտահարվածների թիվը, և, որպես հետևանք, վարակումից հետո մահացու վախճանների թիվն անշեղորեն աճում են: Նախագահն, իր մերձավոր շրջապատի խոսքերով՝ մտադիր է ցուցադրել իշխանությունների գործողությունների արդյունավետությունը և դրանով իսկ ընդգծել այդ հիմնախնդրի նկատմամբ իր վերաբերմուքի արմատական տարբերությունն այն մոտեցումից, որն ուներ Սպիտակ տանը նրա նախորդ Դոնալդ Թրամփը:
Բայդենն, ինչպես ավելի վաղ հաղորդվել է, մտադիր է առաջիկա 100 օրվա ընթացքում խստացնել բոլոր դաշնային հիմնարկություններում դիմակ կրելու ռեժիմը և սոցիալական հեռավորության միջոցների պահպանումը, ակտիվացնել COVID-19-ի դեմ բնակչության պատվաստման արշավը, ինչպես նաեւ ձեռնարկել բժշկական և սոցիալական բնույթի այլ քայլեր՝ համավարակի հակազդման համար: Վերջին տվյալների համաձայն՝ համաճարակի սկզբից ԱՄՆ-ում հայտնաբերվել է կորոնավիրուսով վարակման 24 438 721 դեպք, մահացել է 406 147 մարդ: Երկիրը երկու ցուցանիշներով էլ զբաղեցնում է առաջին տեղն աշխարհում:
