ՀՀ ազգային ժողովի «Լուսավոր Հայաստան» խմբակցության ղեկավար Էդմոն Մարուքյանը վարչապետ Նիկոլ Փաշինյանի արտահերթ ընտրությունների անցկացման վերաբերյալ հուշագրին ի պատասխան առաջարկել է կոնտր-հուշագիր:
ԼՀԿ ղեկավարը խորհրդարանական ճեպազրույցների ժամանակ հիշեցրել է, որ վարչապետի հետ հանդիպման ժամանակ վերջինս առաջարկել է ստորագրել հուշագիր, որով կպարտավորվեն, որ վարչապետի հրաժարականից հետո ԼՀԿ-ն չի առաջադրի Մարուքյանի թեկնածությունը: «Սակայն ես ասել եմ, որ մեր օրակարգը անցումային կառավարություն ձևավորելու օրակարգ է: Անցումային կառավարության մեր թեկնածուն ես եմ, և պետք է առաջադրվեմ»,-ասել է Մարուքյանը։ Նա նշել է, որ կոնսենսուսի բացակայության հետևանքով հուշագրի թեման փակվել է:
Մարուքյանն ընդգծեց, որ ԲՀԿ-ի պատգամավորների հետ 45 հոգի են, եթե գումարեն «Իմ քայլը»-ից դուրս եկած 5 պատգամավորին, ստացվում է 50: Ընդ որում այդ 50-ն էլ պայմանական է: Իսկ իշխանական պատգամավորի թիվը 82 է:
«Եթե իրենք վստահ չեն իրենց 82-ի վրա, որ հնարավոր է՝ ես առաջադրվեմ, ինձ ընտրեն, դա ուրիշ քննարկման հարց է: Եթե վստահ են, ապա ի՞նչ խոչընդոտ կա խորհրդարանը ցրելու»,-նշել է նա:
Մարուքյանն ասել է, թե ինչ է նախատեսում կոնտր-հուշագիրը: «Առաջարկել եմ՝ եկեք ստորագրենք հուշագիր, որ ես ընտրվում եմ, մինչև հուշագիրը ստորագրելը պայմանավորվում ենք, որ օրինակ հոկտեմբերի 1-ին հրաժարական եմ տալիս և չեմ առաջադրվում: Եվ պայմանավորվում ենք 3 ուժերով, որ մարդ չենք առաջադրում, և խորհրդարանը հոկտեմբերին ցրվում է, երբ երկիրը կայունացած է լինում, և գնում ենք ընտրությունների: Դա եղել է իմ առաջարկած կոնտր հուշագիրը վարչապետին»:
Նրա խոսքով, սակայն, համաձայնություն չի եղել, չկա հուշագիր, չկա հրաժարական, չկան ընտրություններ: Սակայն ընտրության ճանապարհը բոլորին հայտնի ճանապարհն է: «Եվ, երբ իրենք ասում են, որ այդ ճանապարհը չի լինի առանց ընդդիմության հետ հուշագրի, դուրս է գալիս, որ 45-ը կամ 50-ը մեծ է 82-ից»,-ասել է Մարուքյանն՝ շեշտելով, որ ինքն առաջադրվելու է: