2021 թվականին Շիրակի մարզում կշարունակվեն Գյումրու և Ախուրյանի հրշեջ փրկարարական ջոկատների նոր շենքերի կառուցման աշխատանքները: Դրանք մեկնարկել էին նախոդ տարվա սեպտեմբերին:
Այս տարի կտրվի նաև Աշոցքի հրշեջ փրկարարական ջոկատի նոր շենքի կառուցման աշխատանքների մեկնարկը:
Այս մասին այսօր հայտարարեց Շիրակի մարզային փրկարարական վարչության պետ Ալեքսան Գյոզալյանը՝ Շիրակի մարզպետարանում ամփոփելով անցած տարին:
Դահլիճում տեղի պատասխանատուներից զատ, ներկա էր նաև ԱԻՆ փրկարար ծառայության տնօրենի տեղակալ Հովհաննես Եմիշյանը։
2020 թվականը համարվեց ծանր տարի սկզբում համավարակով, այնուհետ պատերազմով պայմանավորված: Փրկարարները մասնակցել են նաև պատերազմական գործողություններին:
«Տարին եղել է հագեցված ու լարված»,- ընդգծեց Հովհաննես Եմիշյանը՝ առանձնացնելով հատկապես քաղաքացիական պաշտպանության շրջանում առկա խնդիրների լուծմանն ուղղված գործողությունները:
587 արտակարգ դեպք, 24 զոհ և 378 վիրավոր: 2020 թվականի վիճակագրությունը ներկայացրեց Ալեքսան Գյոզալյանը:
«2020 թվականի ընթացքում մարզում 2019թ. համեմատությամբ գրանցված արտակագ դեպքերի թիվը նվազել է 162-ով, զոհերի թիվը նվազել է 1-ով իսկ վիրավորների թիվը նվազել է 121-ով: Գրանցված դեպքերից 444-ը տեխնածին են»,-նշեց նա:
Տարվա ընթացքում արձանագրված 92 սոցիալ-կենցաղային դեպքերից 28 դեղորայքի թունավորման, 23-ը քիմիական նյութերից թունավորման դեպքերն են:
2020 թվականին Շիրակի մարզում արձանագրվել է նաև բնական և շմոլ գազերի, ալկոհոլի թունավորման դեպքեր: Եղել է նաև զինամթերքի հայտնաբերման 3 դեպք: