Ռազմագերիների և գերեվարված անձանց հարցը շարունակում է մնալ մեծ օրակարգում, դա ոչ միայն ներհայաստանյան ամենալուրջ խնդիրն է, այլ նաև դրսից եկող ազդակներն են այդ մասին վկայում: Ի՞նչ իրավական ճանապարհով պետք է գնա Հայաստանը, որպեսզի այն կարճ լինի և արդյունավետ: «Առաջին լրատվական»-ի հետ զրույցում անդրադառնալով այս հարցին՝ իրավապաշտպան Նինա Կարապետյանցը նշեց, որ այդ ճանապարհը պետք է ոչ միայն իրավական լինի, այլ նաև զուգորդված լինի քաղաքական որոշակի գործընթացներով և դա անխուսափելի է:
«Կրակի դադարեցումը մեզ համար օդի ու ջրի պես անհրաժեշտ էր, բայց, կարծում եմ, մենք ճակատագրական սխալ արեցինք, երբ համաձայնվեցինք համանախագահող միայն մեկ երկրի ղեկավարին տալ բոլոր խաղաքարտերը: Այս պահին Պուտինը հայտարարում է, որ համաձայնագրի բոլոր կետերը կատարվում են, բնականոն ընթացքով ընթանում է դրանց գործարկումը, և որևէ խնդիր չկա, բայց ես կարծում եմ, որ մենք մեծ խնդիր ունենք: Մենք հասկանում ենք, որ բոլորը շահեր են գտնում այս բանակցությունների մեջ՝ բացի Հայաստանից: Եվ մեզ համար կենսական առաջնահերթություն ունեցող թիվ մեկ խնդիրը գերիների խնդիրն է, որի լուծումը չի կարող լինել միայն մեկ խաղացողի դերակատարմամբ, պետք է ակտիվացնել մյուս բոլոր հնարավոր տարբերակները:
Իրավապաշտպան Արտակ Կիրակոսյանը հավելեց, որ այս հարցի լուծումը բանակցելու խնդիր է: «Մենք ունե՞նք խաղաքարտ, որը կարող են ներկայացնել, թե ոչ: Այնպիսի տպավորություն է, որ այս իշխանությունը որևէ խաղաքարտ չունի, և մնում է Ադրբեջանի «բարի կամքի» հույսին՝ կուզենա՝ կվերադարձնի, չի ուզենա՝ չի վերադարձնի գերիներին, մենք փոխարենը որևէ բան չենք առաջարկում:
Տարօրինակ վիճակ է, որ Հայաստանն ու Ադրբեջանն իրար նկատմամբ շարունակում ենք թշնամական լեզուն, բայց միևնույն ժամանակ խոսվում է ճանապարհներ բացելու, տնտեսական համագործակցության մասին: Բառապաշարը չես փոխում, բայց թշնամուդ ասում ես՝ արի՛ հաց կիսենք. ինձ համար սա անտրամաբանական և անընդունելի իրավիճակ է: Հարցը պետք է հստակ դրվի՝ մենք գնում ենք խաղաղությա՞ն: Պարզ չէ, թե Հայաստանն ինչ է ուզում, ինչ պարտավորություններ ունի Արցախի նկատմամբ, ինչ պարտավորություններ ունի ՌԴ-ի և Ադրբեջանի նկատմամբ: Ստեղծվել է աբսուրդային իրավիճակ՝ մնալով թշնամի, գնում ենք սերտ հարաբերությունների թշնամու հետ»,- նշեց Կիրակոսյանը:
Մանրամասն՝ տեսանյութում: