Այսօր վերսկսվել է Մարտի 1-ի գործով դատավարությունը: Թեմայի շուրջ «Առաջին լրատվական»-ի հետ զրույցում փաստաբան Սեդա Սաֆարյանը նշեց, որ հուլուսից ինքը և Մարտի 1-ի գործով տուժողների մյուս իրավահաջորդը՝ փաստաբան Տիգրան Եգորյանը դատարան չեն գնում. «Չենք մասնակցում այն կինոյին, որը փորձում են ցուցադրել: Մենք չենք գտնում, թե իրականում այդ դատական քննությունը վերաբերում է Մարտի 1-ի գործին, կարծում ենք, որ դատարանը թույլ է տվել շեղվել Մարտի 1-ի գործից: Մեկ տարի ութ ամիս շարունակվում են պաշտպանական կողմի միջնորդությունների քննարկումները, որոնք նույնաբովանդակ են, և նպատակ են հետապնդում այս գործը ձախողել»:
«Այսօր էլ բացարկ են հայտարարել ՀՀ դատախազին»,- նշեց փաստաբանը: Նա նաև հավելեց, որ դատախազների թուլությունը է տեսնում այդ գործի տեղում դոփելու մեջ. «Այն ժամանակ, երբ որ պետք է սահմանվեր խոսքի սահմանափակում, դատախազները դեռ շատ ավելի վաղ պետք է դա արած լինեին և մտահոգ լինեին, որ պաշտպանության կողմը այդ եղանակով գործը, այսպես ասած, իր ձեռքը կվերցնի, և իրենք կհայտնվեն երկրորդական դերում: Պաշտպանական կողմին հնարավորություն է տրված ամեն ինչ ասելու՝ անկախ նրանից գործի հետ կապված է, թե ոչ… Դատավորը պետք է կարողանա երկու կողմերի վարքը կարգավորել»:
Սեդա Սաֆարյանի դիտարկմամբ՝ ամեն ինչ արվում է, որ բուն դատավարության փուլին չանցնեն: Նրա խոսքով՝ պատերազմն էլ ոչինչ չի փոխել այս գործընթացներում:
«Պատերազմը մեզ չմիավորեց մեր ընդհանուր թշնամու դեմ, ավելին՝ հայ ազգի 70-80 տոկոսը հասկացավ, որ կռվում է ոչ միայն Թուրքիայի և Ադրբեջանի դեմ, այլ նաև իր թիկունքում գործող ուժերի, որոնք խանգարում են և ազդում են շատ հանգամանքների վրա: Խայտառակ իրադարձություններ են տեղի ունեցել ԼՂ-ում, և իրավիճակը դուրս է եկել Գլխավոր գերագույն հրամանատարի հսկողությունից: Եվ կան մարդիկ, որ համարեցին, թե Հայաստանն իր շահերն ունի, ԼՂ-ն՝ իր, դրանից ելնելով դասավորեցին ամեն ինչ, և ունեցանք տխուր պատկեր:
Այսօր կան ուժեր, որոնք հրապարակներում ելույթներ ունենալով, ուզում են դավաճանությունը «քսել» ուրիշների վրա, բայց դավաճանությունը գործողություններ են, և այդպիսի գործողություններ դրսևորել են գեներալ կոչվածները և այն անձինք, որոնք Մարտի 1-ի գործով կա՛մ վկա են, կա՛մ կասկածյալ են, և նրանք չպետք է լինեին բարձրագույն պաշտոններում: Հավատի բարձր շեմը պիտի ունենայինք, որ այդ մարդկանց հետ միասնական գնայինք պատերազմի:
Այս ամեն ինչը տեղափոխվել է նաև դատարան, նպատակը Ռ. Քոչարյանի գործին քաղաքական մոտիվացիա տալն է, մինչդեռ այդ գործը բացարձակապես քաղաքական հետապնդում չէ, բուն փաստերի վրա է հենված, ապացույցներով և բազմադրվագ գործողությունների մի ամբողջ շղթա է, որի վերնամասում նստած են 4 ամբաստանյալները, որոնք փորձում են իրենց վերագրվող արարքը վերագրել ուրիշի»,- նշեց փաստաբանը:
«Իրավապահ համակարգը խայտառակ կերպով դիմադրում է. ոչ մի առաջընթաց չկա, կասեցվում են բազմաթիվ կարևոր գործեր: Համակարգում կան մարդիկ, որոնք լրջորեն զբաղված են համակարգի կազմալուծմամբ»,- նկատեց Սաֆարյանը:
Իրավապաշտպանի խոսքով՝ ցավալի է, որ Հայաստանը անվերջ ներքաղաքական բախումների է գնում: «Ամեն անգամ արյուն է թափվում, անմեղ զոհեր են լինում, և բոլորն ուզում են, որ իրենց ներեն, որովհետև իրենք համարում են, որ դրանով իշխանություն էին պահում: Իսկ այս պարագայում Նիկոլ Փաշինյանը որոշեց թավիշն օգտագործել: Բայց Փաշինյանի թավիշը հոգնեցրեց մարդկանց, որովհետև չի կարելի հրեշների հետ պայքարել պլետով»,- ընդգծեց Սաֆարյանը՝ հավելելով, որ օրենքը բոլորի նկատմամբ պետք է կիրառելի լինի հավասարապես:
Մանրամասն՝ տեսանյութում:
