Այսօր՝ հունվարի 19-ին, ԱԺ հայտարարությունների ժամին ԼՀԿ խմբակցության պատգամավոր Արկադի Խաչատրյանը հիշեցրեց, որ ԲՀԿ-ի ԼՀԿ-ի նախաձեռնությամբ իրավունքի ուժով ստեղծվել է կորոնավիրուսի հարցերով քննիչ հանձնաժողով:
«Ս.թ. հունվարի 12-ին ԱԺ նախագահի կարգադրությամբ հաստատվել է քննիչ հանձնաժողովի կազմը: Նպատակն է նմանատիպ համավարակներին դիմակայումը, դրանց կանխարգելումը և մեր երկրի ինստիտուցիոնալ կարողությունների մեծացումը»,- նշեց նա:
Պատգամավորը հավելեց, որ իրենց անհրաժեշտ կլինի հանրության հետ սերտ համագործակցություն. «Ուստի ես կոչով դիմում եմ մեր հանրությանը, հատկապես մասնագիտական և փորձագիտական շրջանակներին, աջակցել հանձնաժողովին՝ կիսվելով իրենց հետազոտությունների արդյունքներով, այն հարցերով, որոնք կցանկանան դիմել կառավարությանը»:
Խաչատրյանը նաև կոչ արեց հանձնաժողոի աշխատանքներում ընդգրկվել բոլոր այն գործընկերներին, որոնք մտահոգություն են հայտնում տվյալ քննիչ հանձնաժողովի հնարավոր անարդյունավետության վերաբերյալ. «Ձեր սեփական օրինակով ցույց տվեք, թե ինչպիսին պետք է լինի քննիչ հանձնաժողովի անդամը»:
Մանրամասն՝ տեսանյութում: