Ինչպես հայտնի է, օրերս Գյումրի-Երևան մայրուղու Ազատանի հատվածում միջադեպ էր տեղի ունեցել «Հայրենիքի փրկության շարժման» ներկայացուցիչների ու նրանց մուտքը դեպի Գյումրի արգելած քաղաքացիների միջև։ Թեմայի շուրջ «Առաջին լրատվական»-ը զրուցել է Գյումրիի «Ասպարեզ» ակումբի նախագահ Լևոն Բարսեղյանի հետ:
«Ես միշտ համարել եմ, որ չարժե հասարակական, քաղաքական գործիչների ճամփան փակել, թե բան ունեն ասելու, թող գան ասեն, մարդիկ էլ լսեն. սահմանափակումներն ընդհանրապես լավ չեն անդրադառնում հանրության մտքի ու ապագայի վրա: Ով էլ ուզում է լինի, ինչքան էլ մարդիկ համաձայն չլինեն նրա մտքերին կամ մոտեցմանը, ճամփա փակելը կամ այլ ձևերով արտահայտվելը սահմանափակելն անընդունելի եմ համարում»,- նշեց Բարսեղյանը:
Նա նաև ընդգծեց, որ Վազգեն Մանուկյանի հայտարարությունը գնահատում է որպես խայտառակ հայտարարություն:
Հիշեցնենք, որ Վազգեն Մանուկյանը հայտարարել էր, թե «Ճանապարհը փակողները բոմժեր էին, որոնց իշխանությունը փող էր տվել»:
Լևոն Բարսեղյանի խոսքով՝ Մանուկյանը մի քանի անգամ աչքի է ընկել նման ռեպլիկներով: «Ես զարմանում եմ, թե այդպիսի փորձ ունեցող քաղաքական գործիչն ինչու չի կարողանում իրեն տիրապետել… Եվ գուցե լավ է, որ նա իրեն չի կարողանում տիրապետել, և մարդիկ հասկանում են, թե ինչ է ինքը մտածում: Այդ բառից զատ, կարևոր է նաև փող բաժանելու մասին խոսելը, քանի որ, ըստ իս, դա էլ է վիրավորական այդ մարդկանց համար, ովքեր փող չեն վերցրել:
Եթե փող վերցնելու մասին հստակ տեղեկություններ ունի, լավ կլինի մանրամասնի, իսկ եթե ճշմարիտ տեղեկություններ, հենց այնպես մարդկանց մասին զրպարտչական բնույթի բաներ թող չխոսի»:
Բարսեղյանի խոսքով՝ այս միջադեպի հետ կապված՝ կարևոր է նաև մեկ դրվագ. «Ինչ են մտածում կուսակցությունները իրենց առաջադրած վարչապետացուի բառամթերքի մասին»:
Անդրադառնալով դիտարկմանը, որ Արթուր Վանեցյանը և Գագիկ Ծառուկյանը ներողություն են հայտնել, Բարսեղյանը նշեց, որ լավ կլինի 17-ի մյուս ուժերից էլ արձագանք լինի՝ կիսում են Մանուկյանի դիրքորոշումը, թե ոչ:
Մանրամասն՝ տեսանյութում: