Ուելսյան Նյուպորտի բնակիչ Ջեյմս Հոուելսը իր համակարգչից դեն է նետել 7500 բիթքոիններով կոշտ սկավառակը: Այս մասին հաղորդում է CNN-ը:
Երբ IT-մասնագետը նկատել է կորուստը, կոշտ սկավառակի վրա կրիպտոարժույթի գինը հասել է $9 մլն-ի: Ներկա փոխարժեքով նրա վինչեստրում գտնվում է $273 մլն-ի բիթքոին:
Նա կոշտ սկավառակը դեն է նետել դեռևս 2013 թվականին, երբ փոխարժեքը մի քանի անգամ ցածր էր: Այժմ Հոուելսը պատրաստ է տեղի իշխանություններին վճարել ավելի քան $71 մլն, եթե իրեն թույլ տան պեղել աղբավայրը:
Տղամարդու խոսքով՝ նա Նյուպորտի իշխանություններին առաջարկել է $71,7 մլն այդ փողը բոլոր բնակիչների միջև բաժանելու համար՝ այդ դեպքում յուրաքանչյուրը կստանա $239: Սակայն տեղի իշխանությունները ոչ միայն մերժել են Հոուելսին, այլև ընդհանրապես հրաժարվել են քննարկել այդ հարցը:
Երբ ուելսցին հասկացել է իր սխալը, նա մեկնել է տեղի աղբավայր: Բայց այժմ այն այնքան է մեծացել, որ անհնար է կոշտ սկավառակը ինքնուրույն գտնել: Այնուամենայնիվ, նա պեղումներ անելու սեփական ծրագիրն ունի, և Հոուելսը նույնիսկ ստացել է ներդրողների աջակցությունը, որոնք պատրաստ են ֆինանսավորել պեղումները և կոշտ սկավառակում տվյալների վերականգնման աշխատանքը բիթքոինների 50% արժեքի դիմաց. 25%-ը նա պատրաստ է տալ քաղաքին, իսկ իրեն պահել միայն 25%-ը:
Նյուպորտի վարչակազմի ներկայացուցիչները CNN-ին հաղորդել են, որ չեն հրաժարվել տղամարդու առաջարկից, այլ մերժել են նրան աղբավայրում պեղումներ անելու հարցում: Տեղի իշխանությունները հայտարարում են, որ այդպիսի աշխատանքները արգելված են հնարավոր բնապահպանական վնասի պատճառով, ինչպես նաև այն պատճառով, որ դա կարժենա միլիոններ, իսկ երաշխիք, որ սկավառակը կգտնվի, չկա: