Բնակարանի բանալին, որտեղ մահացել է ֆրանսիացի կայսր Նապոլեոն Բոնապարտը Սուրբ Հեղինեի կղզի աքսորվելով, Sotheby’s-ի աճուրդում վաճառվել է գրեթե $112 հազարով: Այս մասին հաղորդվում է աճուրդի տան կայքում:
Զույգ բանալիների հետ վաճառվել է նաև ծրարը՝ հետևյալ գրությամբ. «Լոնգվուդի բնակարանի բանալին, որտեղ մահացել է Նապոլեոնը, և որը անձամբ ես եմ հանել կողպեքից: Չ. Ռ. Ֆոքս, Սուրբ Հեղինե, սեպտեմբերի 6, 1822 թվական»:
Մասունքը հայտնաբերվել է Շոտլանդիայի տներից մեկում եղած ճամպրուկում: Բրիտանական ԶԼՄ-ների տվյալներով՝ ընտանիքը, որին պատկանել է բանալին, իմացել է դրա գոյության մասին, բայց չի կարողացել գտնել: Բանալու տերը նախկինում եղել է Նապոլեոնի երկրպագուհին. նա բրիտանացի զինվորական Չարլզ Ռիչարդ Ֆոքսի մայրն էր: Ֆոքսն է բանալին բերել Շոտլանդիա և նվիրել իր մայրիկին:
Բանալու նախնական գինը եղել է $4-7 հազար, այդպիսով այն վաճառվել է գրեթե 16 անգամ թանկ:
Նապոլեոնը Ատլանտյան օվկիանոսում գտնվող բրիտանական կղզում է անցկացրել իր կյանքի վերջին տարիները, որտեղ էլ մահացել է 1821 թվականի մայիսի 5-ին: