«Պարադիգմա» կրթական հիմնադրամը հրապարակել է մարդկային հասարակության ապրած պատմության և դրա ուսուցման մասին գիրք, որը կոչվում է «Ինչո՞ւ, ինչպե՞ս», և տալիս է բազմաթիվ հարցերի պատասխաններ: «Առաջին լրատվական»-ի հետ զրույցում «Պարադիգմա» կրթական հիմնադրամի համահիմնադիր, կրթության հետազոտող Նարեկ Մանուկյանը նշեց, որ այս գիրքը ներկայացնում է պատմության քննական ուսուցումը դպրոցում, որտեղ կարևորվում է ոչ թե փաստերն անգիր անելը, այլ օգնելը սովորողներին՝ վերլուծել պատմությունը: Գրքում ներկայացված է 60 ռազմավարություն: Օրինակ՝ ներկայացվում են ծաղրանկարներ: Նպատակը պատմությունը մեկնաբանելու, պատճառահետևանքային կապերը տեսնելու հմտությունների զարգացումն է և որոշակի աշխարհընկալում ձևավորելը: Գրքում կա նաև տեսություն՝ հիմնված 6 սկզբունքների վրա, որոնք օգնում են զարգացնել պատմական մտածողությունը, վերլուծելու կարողությունը»:
«Պատմությունից հնարավոր է դասեր քաղել, եթե կարողանանք վերլուծել և մեր վերլուծությանը տալ աշխարհընկալման որոշակի պրիզմա»,- նշեց Մանուկյանը:
Նրա խոսքով՝ ցավոք մեր հասարակությունը մշտապես փնտրում է փրկիչներ և դավաճաններ: «Եթե մենք կարողանանք բացատրել, թե ինչ է տեղի ունեցել, ինչու է տեղի ունեցել, և ունենանք փաստարկված մոտեցում իրադարձություններին, կկարողանանք հասկանալ, թե ինչ պետք է անենք:
«Նիկողայոս Ադոնցը մի աշխատության մեջ դիտարկում է Վարդան-Վասակ հակադրությունը և առաջարկում է դավաճան – ոչ դավաճան հարացույցում չդիտարկել հակադրությունը, այլ վերլուծել, թե ինչ քաղաքական հայացքների կրողներ էին նրանք, և ինչու տեղի ունեցան այդ ժամանակվա իրադարձությունները»,- նշեց մեր զրուցակիցը՝ հավելելով, որ փրկիչ և դավաճան փնտրելը ստերեոտիպային է, որից պետք է հրաժարվել և անհրաժեշտ է խորքային վերլուծություն կատարել:
Մանրամասները՝ տեսանյութում: