Հայաստանյան ներքաղաքական ճգնաժամի և անորոշության հանգուցալուծմանը հնարավոր կլինի հասնել ընտրություններով: Ո՞ր դեպքում Հայաստանը պատրաստ կլինի արտահերթ ընտրություններին՝ հաշվի առնելով նաև իրավական երաշխիքները: «Առաջին լրատվական»-ի հետ զրույցում, ի պատասխան այս հարցի, փաստաբան Տիգրան Եգորյանը նշեց, որ հեղափոխությունից հետո աշխատանք պետք է մեկնարկեր և լուծվեին արդարադատության, ընտրանական իրավունքի ոլորտում կուտակված հարցերը, ինչպես նաև աշխատանք պետք է իրականացվեր կոռուպցիայի ցանցի հաղթահարման և կառավարման արդյունավետության ուղղությմաբ: «Առնվազն առաջիկա վեց ամիսը պետք է տրամադրվի պետության վերակենդանացման միջոցառումներին, որոնք կապահովեն այնպիսի մթնոլորտ, որտեղ հնարավորինս առավելագույն արդյունավետությամբ տեղի կունենան ընտրական գործընթացներ»,- նշեց Եգորյանը:
«Իրավունքի Եվրոպա» միավորում ՀԿ նախագահ, փաստաբան Լուսինե Հակոբյանը հավելեց, որ գոնե դատական իշխանությունում պետք է մթնոլորտը փոխելու ուղղությամբ ջանքեր գործադրվեն, հակառակ դեպքում ընտրություններում կունենանք մի պատկեր, երբ դիտորդներին, վստահված անձանց ահաբեկողների նկատմամբ կալանքի միջնորդությունները չեն բավարարվի, և նրանք նորից կվերադառնան ընտրատեղամասեր և կշարունակեն ահաբեկել:
Լուսինե Հակոբյանի դիտարկմամբ՝ դատական համակարգը նոյեմբերի 10-ից հետո միանգամից ցատկեց հին դաշնակիցների կողքը.«Դա մասնավորապես ակնհայտ դարձավ ԲԴԽ նախագահի հայտարարությամբ, և դրան հետևեցին առանձին դատավորների կողմից քայլեր, որոնք ակնհայտորեն ի ցույց դրեցին նրանց կախյալությունը նախկին կլանից… ԲԴԽ նախագահի հայտարարությունը դեմ էր դատական համակարգի անկախությանը»:
Տիգրան Եգորյանը հավելեց, որ ԲԴԽ նախագահի հայտարարությունը դատական համակարգին ուղղված արտոնության երաշխիք էր:
Անդրադառնալով ԲԴԽ խորհրդի գործունեությանը՝ Տիգրան Եգորյանը նշեց, որ ԲԴԽ-ն ունի կարևոր, ընդգրկուն և էական ազդեցություն գործելու իրավական լծակներ, մեխանիզմներ, և եթե ԲԴԽ-ն աշխատի կայուն և ամբողջ ֆունկցիոնալությամբ, կարող է էական ստաբիլիզացիոն դետալ հանդիսանալ ամբողջ համակարգում: «Կարող է նաև հանդիսնալ «չար ուժերի», ապակայունացման երաշխավոր: Այս պահին չունենք այնպիսի ԲԴԽ, որը կերաշխավորեր Սահմանադրությամբ սահմանված դատարանների անկախության և արդար դատաքննության իրավունքի նկատմամբ այնպիսի ջանասեր աշխատանքը, որ կկայունացներ կարգազանց դատավորների գործունեությունը: ԲԴԽ-ում երկու թափուր տեղ կա, եթե դրանք լրացվեն այնպիսի կադրերով, որոնք ի զորու են այդ նախանձախնդրությունն ապահովել՝ ամենօրյա աշխատանքով, կունենանք բալանսավորված ԲԴԽ՝ 5-ը 5-ի դեմ, ինչը դեռ չի նշանակում, որ ԲԴԽ-ն կարող է արդյունավետ գործել, դեռ խմորման ահագին գործընթաց է սպասվում»:
Անդրադառնալով նախկին զինդատախազ Գագիկ Ջհանգիրյանի՝ որպես ԲԴԽ թեկնածուի առաջադրման վերաբերյալ դիմադրությանը, Լուսինե Հակոբյանը նշեց, որ մեկ փաստարկ է հնչեցվել՝ հաշվի առնելով տարիքային շեմը, նաև քաղհասարակությունը վերապահումներ ունի՝ կապված մասնավորապես Մատաղիսի և այլ գործերի հետ. «Բայց այն հանգամանքը, որ ԲԴԽ-ից անհանգստության նշաններ են գալիս, նշանակում է, որ Գագիկ Ջհանգիրյանը ունակ է այնտեղ ձևավորված «կայուն անդորրը» որոշակի առումով խաթարել, ինչը կարելի է որպես լավ նշան դիտարկվել այս պահին»:
Մանրամասն՝ տեսանյութում:
