«Հնարավոր է, որ դա պատահականություն է, իսկ եթե պատահականություն չէ, ապա սադրանք է»,- այս մասին «Առաջին լրատվական»-ի հետ զրույցում ասաց Գերագույն խորհրդի նախկին պատգամավոր Ազատ Արշակյանը՝ անդրադառնալով դիտարկմանը, որ հրադադարը խախտվել է Ադրբեջանի կողմից, հայկական կողմն ունի ծանր վիրավոր. այդ խախտումը գրանցվել է մոսկովյան հանդիպումից առաջ:
«Ենթադրվում է, որ ադրբեջանական կողմը դժգոհ է եղել մոսկովյան հանդիպման օրակարգից»,- նշեց Արշակյանը՝ հավելելով, որ Ադրբեջանի իշխանությունները հայտարարում են, որ Արցախում, բացի Ադրբեջանի Զինված ուժերից, այլ զինված ուժեր չպետք է լինեն: «Ադրբեջանը պահանջում է, որ պետք է լինի ադրբեջանական սահմանապահ ուժ, որը կգրանցի ելումուտը: Այս պահանջը արձանագրված չէ հայտարարության տեքստում: Սադրանք են անում, որ այդ հարցը դառնա օրակարգային հարց: Մեր խնդիրն է նոր օրակարգ թելադրել, և ներառել, օրինակ, ԼՂ կարգավիճակի հարցը»,- նշեց Ազատ Արշակյանը:
Քաղաքագետ Ռոբերտ Ղևոնդյանը նշեց, որ Թուրքիան հայտարարություն է արել այն մասին, թե իրենք փորձելու են ձևավորել այնպիսի միջավայր, որ առանց ռուս խաղաղապահների հնարավոր լինի համակեցություն ապահովել Արցախում. Թուրքիան նկատի ունի առանց հայերի մասնակցության համակեցությունը:
Քաղաքագետի դիտարկմամբ՝ մոսկովյան 4-ժամյա քննարկմանը հավանաբար հարցերի ավելի լայն շրջանակ է քննարկվել, քան հանրայնացվել է: «Հնարավոր է, որ քննարկվել է նաև Արցախի կարգավիճակի հարցը: Հիշենք՝ Ալիևը հայտարարեց, որ այս պատերազմը լուծեց հակամարտության հիմնական հարցը, իսկ Փաշինյանը հայտարարեց, որ կա Արցախի կարգավիճակի խնդիր»:
Ռ. Ղևոնդյանի դիտարկմամբ՝ սադրանքներ իրականացվելով՝ Ադրբեջանը փորձում է փոքր քայլերով ցույց տալ, որ սեփական օրակարգն արդեն իրողություն է:
«Պետք է պատրաստվել հաջորդ պատերազմին»,- ընդգծեց «Անտարես» հրատարակչության տնօրեն Արմեն Մարտիրոսյանը՝ հավելելով, որ պատերազմից հետո կրակոցները միանգամից չեն դադարում: Նրա խոսքով՝ չպետք է տեղիք տալ պրովոկացիաներին, այլ պետք է հակափաստարկներ ներկայացնել և առաջ տանել սեփական շահերը:
Ազատ Արշակյանի կարծիքով՝ պետք է դատի տալ Ադրբեջանին՝ էթնիկ հայերի իավունքները ոտնահարելու համար:
Անդրադառնալով Ադրբեջանում գտնվող հայ ռազմագերիների վերադարձի խնդրին, Ազատ Արշակյանն ընդգծեց, որ գերիների հարցը պետք է միջազգայնացվի. «Վարչապետն անելիք ունի. նա պետք է բոլոր դեսպաններին հրավիրի և քննարկի մեր գերիների հարցը»:
Մանրամասները՝ տեսանյութում:
