Հունվարի 11-ին Մոսկվայում տեղի ունեցավ եռակողմ ձևաչափով հանդիպում, սակայն գլխավոր հարցը, որն այսօր հուզում է հայ հանրությանը, այդպես էլ մնաց չլուծված: Թեմայի շուրջ «Առաջին լրատվական»-ը զրուցել է իրավապաշտպան Ժաննա Ալեքսանյանի և իրավաբան, «Քաղաքացու որոշում» կուսակցության անդամ Նարեկ Ներսիսյանի հետ:
Մոսկովյան հանդիպումից հետո պաշտոնապես հայտարարվեց, որ գերեվարված անձանց վերադարձի հարցի հետ կապված առաջընթաց չի գրանցվել: Անդրադառնալով այս հայտարարությունը՝ ժաննա Ալեքսանյանը նշեց, որ բացի այդ նախադասությունից, ուրիշ բան չհայտնեցին այդ հարցի վերաբերյալ: «Վարչապետը, երբ վերադարձավ, կարող էր ավելին ասել, թե ինչու պայմանավորվածություն չեղավ այդ հարցի շուրջ և ինչու առաջընթաց չգրանցվեց: Սա շատ կարևոր և առաջնային հարց էր: Ինչպես որ պատերազմի մասին չգիտենք, թե ինչպես եղավ, նույնն էլ հիմա է, մանրամասներ չգիտենք:
ՌԴ նախագահը շատ լավ հասկանում է, որ գերիների հարցն առաջնային է, նա բազմիցս հայտարարել էր, որ իրենք միջնորդելու են և նպաստելու են, որ այդ հարցերը կարգավորվեն, բայց հիմա ոչ մի խոսք չլսեցինք նրա կողմից, ինչպե՞ս կարելի էր լռել:
Այնպիսի տպավորություն է, որ պարտությունից հետո պատժում են մեր երկրի վարչապետին, և հիմա այս հանդիպման ընթացքում էլ կարող էր լինել մի քննարկում, որն արդեն չէր ընդունի Փաշինյանը, և հանդիպումն այսպես կավարտվեր՝ առանց գերիների հարցի շուրջ առաջընթացի»:
Իրավապաշտպանի գնահատմամբ՝ մոսկովյան եռակողմ հանդիպումը հակամարդկային էր, քանի որ մարդասիրական, այն է՝ ռազմագերիների և անհետ կորածների վերադարձի հարցում առաջընթաց չգրանցվեց:
Նարեկ Ներսիսյանի խոսքով՝ պաշտոնապես պատերազմ չէր հայտարարվել և միջազգային պայմանագրերին հավասարազոր փաստաթուղթ չի ստորագրվել, և սա պատճառներից մեկն է, որ հումանիտար հարցերը թողնում են օդում:
«Մարդասիրական առումով սա թուրք-ադրբեջանական կողմից ուղղված հստակ ուղերձ է, որ Արցախում չպետք է լինեն զինված հայ անձինք: Ադրբեջանը փորձում է հիմնավորել, որ իբրև թե գերեվարված անձինք ոչ թե ռազմագերի են, այլ ահաբեկիչ, ինչը աբսուրդ է: Ադրբեջանը Արցախը համարում է իր անբաժան մաս, և համարում է, որ այնտեղ կարող են լինել միայն ադրբեջանական զինված միավորումներ: Այստեղ լուրջ հակասություներ կան: Արցախի հարցը փաստացի լուծված չէ»,- նշեց Ներսիսյանը:
Քննարկման մասնակիցների դիտարկմամբ՝ Ադրբեջանը ռազմագերիների հարցը օգտագործում է մեր հոգեբանական պարտությունը խորացնելու համար:
Մանրամասն՝ տեսանյութում:
