ԱՄն գործող նախագահ Դոնալդ Թրամփը տեսաուղերձ է հղել ԱՄՆ քաղաքացիներին, որում հայտարարել է, որ իր իրական կողմնակիցները չէին կարող բռնություն գործել։ Տեսանյութը հրապարակվել է Սպիտակ տան թվիթերյան էջում։
Այսպիսով՝ պետության ղեկավարը կրկին դատապարտել է Կապիտոլիումի վրա գրոհ իրականացրած անձանց գործողությունները, և ընդգծել, որ իր կողմնակիցները չէին կարող հարձակվել ոստիկանների վրա։ Նա խոստացել է, որ վաշինգտոնյան անկարգությունների մասնակիցները դատարանի առջև կկանգնեն։
Բացի այդ, Սպիտակ տան ղեկավարը հայտարարել է, որ հանձնարարել է իրավապահներին օգտագործել բոլոր անհրաժեշտ միջոցները՝ հունվարի 20-ին Ջոզեֆ Բայդենի երդմնակալության ժամանակ մայրաքաղաքում անվտանգության ապահովման համար։ Թրամփը կոչ է արել ամերիկացիներին համախմբվել որպես միասնական ժողովուրդ։
Թեև Թրամփը տեսաուղերձը հղել է Ներկայացուցիչների պալատի կողմից իր դեմ իմփիչմենթ հայտարարելուց հետո, սակայն նա չի անդրադարձել այդ հարցին, այլ խոսել է խոսքի ազատության վրա աննախադեպ հարձակումների մասին՝ նկատի ունենալով սոցցանցերում իր օգտահաշիվների արգելափակումը։