Կորոնավիրուսային վարակի դեմ պատվաստանյութի մշակումը հայրենական գիտնականների միակ ձեռքբերումը չէ, բեկումնային հետազոտություններ կան նաեւ այլ ոլորտներում: Այդ մասին Ռուսաստանի գիտությունների ակադեմիայի (ՌԳԱ) նախագահ Ալեքսանդր Սերգեեւը հայտարարել է հունվարի 13-ին «Ռոսիյսկայա գազետա»-ում հրապարակված հարցազրույցում:
«Կորոնավիրուսի դեմ մեր պատվաստանյութերը սենսացիա են դարձել ամբողջ աշխարհի համար, ինչ-որ մեկն անմիջապես սկսեց կասկածներ հայտնել, ինչը եւ հասկանալի է՝ մրցակցությունը շատ դաժան է: Բացի պատվաստանյութից, մենք ունենք նաեւ այլ լուրջ ձեռքբերումներ»,- ասել է Սերգեեւը՝ պատասխանելով հրատարակության այն հարցին, թե ինչպիսին են Ռուսաստանի գիտության ձեռքբերումները համաշխարհային մակարդակով:
ՌԳԱ-ի նախագահի խոսքով՝ նաեւ «համաշխարհային աստղաֆիզիկայի համար բեկում են դարձել «Սպեկտիր-ՌԳ» տիեզերական դիտարանի արդյունքները:
Նա նշել է, որ «վերջերս մեր գիտության եւս մեկ նշանավոր ձեռքբերում է Բեխտերեւի հիվանդության (հոդերի խրոնիկական սիստեմային աուտոիմունային հիվանդություն) դեմ դեղամիջոցը»:
«Գիտնականները գտել են, թե սեփական իմունիտետի հատկապես որ բջիջներն են սպանում տիրոջ օրգանիզմը, եւ դրանց դեմ ստեղծել են ուղղորդված գործողությամբ նյութ: Այդ կարեւորագույն հետազոտությունը կապված է ոչ միայն Բեխտերեւի հիվանդության հետ, դրա նշանակությունը շատ ավելի ընդարձակ է:
Խոսքն այսպես կոչված չեզոքացուցիչ հակամարմիների մասին է, որոնք կարող են կիրառվել ամենատարբեր աուտոիմունային հիվանդությունների բուժման համար, երբ օրգանիզմի իմունային բջիջները սկսում են գրոհել առողջ բջիջների վրա»,- հայտարարել է ՌԳԱ-ի ղեկավարը: Դրա հետ մեկտեղ նա ճշտել է, որ չեզոքացուցիչ հակամարմիները կարող են կիրառվել նաեւ քովիդի բուժման համար»: «Մեզ մոտ սկսվում են հակամարմնի կլինիկական փորձարկումներ, որոնք չեզոքացնում են SARS-CoV-2-ը: Այն մշակվել է ՌԳԱ-ի գիտնականների կողմից՝ չինացի գործընիկերների հետ համատեղ»,-ասել է Սերգեեւը, հաղորդել է «Ինտերֆաքս»-ը:
