Առողջապահության նախարարության առաջարկով Հայաստանի Հանրապետությունում կարանտինային ռեժիմը ևս 6 ամսով կերկարաձգվի՝ մինչև հունիսի 11-ը։ Որոշումը էկոնոմիկայի նախարարի սրտով չէ։ Նա համարում է, որ տնտեսությունը պետք է շնչի։
Տնտեսագետների կանխատեսմամբ ևս կարանտինի երկարաձգումը չի կարող լրացուցիչ բացասական հետևանքներ չթողնել ՀՀ տնտեսության վրա։ Հետևաբար` լավագույն տարբերակն այն է, որ տնտեսությունը սովորի գոյատևել կորոնավիրուսի հետ միասին։ «Շուտով կլինի մեկ տարի, որ այս վիրուսը կա, որի պատճառով տնտեսությունը բազմաթիվ վնասներ է կրում։ Պետք է արդեն իսկ մշակված լինեին այն կառուցակարգերը, որոնց պայմաններում տնտեսությունը կարող էր աշխատել։ Ես կողմ եմ, որ առողջապահության նախարարությունը ձեռնամուխ է լինում կարանտինի երկարացմանը, քանի որ դա իր քաղաքականության իրականացման շրջանակներում է։ Մարդու կյանքն ավելի թանկ է, քան տնտեսությունը։ Բայց տնտեսությունն էլ պետք է զարգանա։ Իսկ դրա համար հարկավոր է, որ էկոնոմիկայի նախարարը ոչ թե հակադարձի իր գործընկերոջը, այլ փորձի մտածել, թե ինչ անել, որ առկա պայմաններում ապահովվի տնտեսության բնականոն գործունեությունը։ Իսկ որ տնտեսությունը պետք է աշխատի, դա միանշանակ է։ Հակառակ դեպքում մենք բյուջեում փող չենք ունենա, որ լուծենք անգամ մեր պաշտպանության, առողջապահական ու սոցիալական խնդիրները, որոնք հիմա՝ պատերազմից հետո, որպես մեծ բեռ դրվել են պետության ուսերին»,- «Առաջին լրատվական»-ի հետ զրույցում ընդգծեց տնտեսագետ Մովսես Արիստակեսյանը։
Տնտեսագետի խոսքերով նախարարները, նախ և առաջ, կառավարման մասնագետներ՝ մենեջերներ պետք է լինեն, որ կարողանան հարմարվել տարբեր սահմանափակումների, ֆորսմաժորային իրավիճակների երկրի տնտեսությունը զարգացնելու համար։ «Պետք է ճկուն լինել։ Կորոնավիրուսը շարունակվելու է, լինելու են երրորդ, չորրորդ ալիքներ, լինելու է նոր տեսակի վիրուս։ Պետք է հարմարվել իրավիճակին մինչև պատվաստանյութ լինի։ Մենք պետք է կորոնավիրուսի հետ հարմարվենք՝ որպես սովորական գրիպի, իսկ գրիպի ժամանակ տնտեսությունը չի կանգնում»,- ասաց Արիստակեսյանը։
Ամեն դեպքում, տնտեսագետի դիտարկմամբ, կարանտինի երկարաձգումը կազդի բնականաբար զբոսաշրջության, սպասարկման և այլ ոլորտների վրա։ Արիստակեսյանի խոսքերով՝ զբոսաշրջությունը չպետք է լիներ մեր տնտեսության գերակայությունը, քանի որ այն իր հերթին որոշ սահմանափակումներ ունի։ Երկրի տնտեսության գերակա ուղղությունը պետք է լինեն վերամշակող արդյունաբերության՝ հատկապես ծանր արդյունաբերության ուղղությունները, որոնք կորոնավիրուսի պայմաններում էլ չէին կանգնի և տնտեսությունը կզարգանար։
«Տնտեսության այլ ճյուղեր ևս պետք է համարվեն գերակա։ Դրանց մասին ես նոր նախարարին նամակ եմ գրել և արդեն 1 ամսից ավելի է սպասում եմ արձագանքի, սակայն ոչ մի արձագանք չկա, չեն կանչում մանրամասները քննարկելու։ Բայց, եթե տեղական փորձագետների խոսքը չեն ուզում լսել, թող ուսումնասիրեն, հետպատերազմյան Գերմանիայի տնտեսության վերականգնման փորձը, թող Ադենաուերի կառավարության էկոնոմիկայի նախարարի փորձն ուսումնասիրեն ու փորձեն իրական գործ անել»,- ընդգծեց տնտեսագետը։
Ռեստորանների հայկական միության գործադիր տնօրեն Վահե Գևորգյանը «Առաջին լրատվական»-ի հետ զրույցում ասաց, որ բացասական են գնահատում կարանտինային ռեժիմի երկարաձգման որոշումը։ Նրա խոսքերով՝ տնտեսությունը պետք է աշխատի, հակառակ դեպքում արդեն իսկ շատ լուրջ խնդիրներ են առաջ եկել։ Բազմաթիվ բիզնեսներ են փակվել, շատերը փակվելու եզրին են, և պետք է քայլեր ձեռնարկել այդ իրավիճակը շտկելու, այլ ոչ թե ավելի խորացնելու համար։ «Մենք բացասական ենք գնահատում այս որոշումը։ Հուլիսին, երբ բավականին ծանր էր իրավիճակը, կարանտինը մտավ, բայց հիմա, երբ իրավիճակը թեթևացել է, կարանտինն էլի երկարացնում են։ Մենք գտնում ենք, որ տնեսությունը պետք է աշխատի, մեր առաջ շատ ծանր հարցեր են կանգնած։ Մենք հասկացանք, որ միայն ուժեղ տնտեսությամբ կարող ենք հաղթել։ Հետևաբար` տնտեսությունը միանշանակ պետք է աշխատի»,- ասաց Գևորգյանը։
Մեր զրուցակցի խոսքերով՝ իրենք հույս ունեն, որ անգամ կարանտինային ռեժիմի պարագայում որոշակի մեղմացումներ արվեն, լրացուցիչ խոչընդոտներ չստեղծվեն այն երկրներից եկողների համար, որտեղ բարվոք վիճակ է։ Գևորգյանը նաև ասաց, որ իրենց ոլորտի վերաբերյալ առկա սահմանափակումները մեղմացնելու առաջարկով իրենք արդեն իսկ դիմել են կառավարությանը։
Լուսանկարը՝ panorama.am-ի
