Գերիների հարցը Ադրբեջանն ամեն կերպ փորձում է բանակցային օրակարգից հանել: «Առաջին լրատվական»-ի հետ զրույցում այս մասին ասաց «Հանուն Հանրապետության» ԺՊԴԿ անդամ Վահագն Մարտիրոսյանը՝ անդրադառնալով դիտարկմանը, որ մոսկովյան եռակողմ հանդիպումից հետո գերիների հարցը մնաց առկախված:
«Մեր պետությունը, ի դեմս արտգործնախարարության, ԱԺ-ի, պետական բոլոր ատյանների, որոնք միջազգային կազմակերպություննրի հետ առնչություն ունեն, պետք է գերիների հարցին տան միջազգային իրավական աստառ, որովհետև միջազգային կոնվենցիաներով բոլոր այն անձինք, որոնք Ադրբեջանում են հայտնվել պատերազմի հետևանքով, պետք է կրեն գերու կարգավիճակ: Մենք միջազգային կազմակերպություններում այդ հարցը բարձրացնելով՝ միջազգային իրավունքի կարգով կարող ենք պարտադրել Ադրբեջանին վերադարձնել գերիներին»,- նշեց Մարտիրոսյանը: Նրա խոսքով՝ այս հարցը արտգործնախարարության ուշադրության կենտրոնում է:
Մարտիրոսյանի դիտարկմամբ՝ քաղաքական առևտուր է տեղի ունենում: «Քանի որ հրադադարի մասին նոյեմբերի 9-ի փաստաթուղթը ստորագրվել է Ռուսաստանի միջնորդությամբ և երաշխավորությամբ, ապա մեր գերիների հարցի լուծումը նաև Ռուսաստանի պատվի հարցն է, նաև դրանով է որոշվելու նրա քաղաքական կշիռը այս տարածաշրջանում»,- նշեց Մարտիրոսյանը:
Փաստաբան Գևորգ Դավթյանի դիտարկմամբ՝ այն, որ գերիների հարցին հանգուցալուծում չտրվեց, կարելի և՛ համարել դիվանագիտական ձախողում, և՛ չհամարել:
«Գերիների հարցին լուծում չտրվեց, սակայն այդ հարցը փակված չի կարելի համարել: Ադրբեջանը խախտում է նոյեմբերի 9-ին ձեռք բերված պայմանավորվածությունը՝ համաձայնագրի 8-րդ կետի իրականացումը:
Երբ Ադրբեջանի նախագահը հայտարարում է, որ այնտեղ ռազմագերիներ չեն, այլ ահաբեկիչներ, նա պետք է կոնկրետ փաստեր ներկայացնի իրավական հարթությունում»,- նշեց Դավթյանը:
Քննարկման մասնակիցների գնահատմամբ՝ Ալիևը ռազմագերիներին ահաբեկիչ անվանելով՝ քաղաքական հայտարարություն է անում Հայաստանում ներքին կայունությունը խարխլելու և դա որպես զենք Հայաստանի նկատմամբ օգտագործելու համար, այսինքն՝ Ադրբեջանը քաղաքական շանտաժի ճանապարհն է բռնել, որպեսզի շահեկան դիրքերից հանդես գա ցանկացած հարցում՝ կապված թե՛ սահմանների հետ, թե՛ ճանապարհների ապաշրջափակման հետ:
«Ադրբեջանը սխալ քայլեր է կատարում, իր կողմից ստանձնած պարտավորվածությունը չի կատարում: Ադրբեջանը գերիների վերադարձը ձգձգում է և դրա քաղաքական նպատակը ՀՀ-ի նկատմամբ առավելություններ ունենալն է»,-նշեց Գևորգ Դավթյանը:
Վահագն Մարտիրոսյանն ընդգծեց, որ գերիների հարցը պետք էր կապել ճանապարհների ապաշրջափակման վերաբերյալ կետի հետ և քանի դեռ գերիների խնդրին լուծում չէր տրվել, չպետք է զբաղվեին հաղորդուղիների ապաշրջափակման հարցերով և ճանապարհների բացման մասին խոսք անգամ չպետք է լիներ: «Կարծում եմ՝ Փաշինայնն այս քայլին գնացել է զուտ ՌԴ-ի հետ հարաբերությունները չլարելու համար»,- նշեց Մարտիրոսյանը:
Մանրամասն՝ տեսանյութում:
