Այսօր Հայաստանը արտաքին աշխարհում իր խնդիրներն առաջ տանելու հնարավորություն չունի: Այս մասին «Առաջին լրատվական»-ի հետ զրույցում ասաց ռեժիսոր, հրապարակախոս Տիգրան Պասկևիչյանը՝ հավելելով նաև, որ Հայաստանում չկա մի կառույց, որը կարող է դիմագրավել չարաբաստիկ հայտարարության հետևանքները:
Նրա դիտարկմամբ՝ Հայաստանում հետպատերազմյան ծանր մթնոլորտի լիցքաթափման համար անհրաժեշտ է, որ իշխանափոխություն տեղի ունենա: «Լիցքաթափումը պետք է լիներ դեռ նոյեմբերին, և դա պետք է տեղի ունենար առնվազն վարչապետի հրաժարականով: «Իմ քայլը» իր ներսից պետք է ընտրեր նոր վարչապետ և անմիջապես հայտարարեր նոր ընտրությունների մասին: Սա կկանխեր քաղաքական այն աղմուկը, այն խժդժությունները, որ այսօր բարձրացնում է իրենից ոչինչ չներկայացնող ընդդիմությունը»,- նշեց Պասկևիչյանը:
Նրա խոսքով՝ այսօր պետք է ոչ թե դատափետել ու հայհոյել իշխանությանը կատարվածի համար, այլ փորձել իրավիճակից ելքեր գտնել: «Կա այսպիսի խոսակցություն՝ թող Նիկոլը գնա: Ես գտնում եմ, որ Նիկոլը պարտավոր է գնալ, և վաղ թե ուշ կգնա: Իսկ ո՞վ ասաց, որ Նիկոլը գնա, ավելի լավ կլինի Վազգեն Մանուկյանը գա, ո՞վ է որոշում: Հայաստանում իշխանությունը պետք է ձևավորվի ընտրությունների միջոցով: Իսկ ընտրողին Վազգեն Մանուկյանը և 16-ը չեն վստահում, նրանք ուրախ չեն լինի, որ Հայաստանում ընտրություններ լինեն»:
Պասկևիչյանի դիտարկմամբ՝ արտահերթ ընտրությունների հարցը չի հասունանում երկու պատճառով. «Նախ՝ դա չի ուզում Փաշինյանը, որովհետև վստահ չէ, որ արտահերթ ընտրություններից հետո իր ղեկավարած խումբը կանցնի խորհրդարան, և դա չի ուզում նաև Վազգեն Մանուկյանի դեմքով ներկայացող 16-ի խումբը»:
Մանրամասն տեսանյութում: