«Ճիշտ կառուցված քաղաքականության, դիվանագիտության և կառավարման դեպքում նույնիսկ բնական պաշարներից զուրկ ժողովուրդը ի վիճակի է հասնել շատ մեծ հաջողությունների»․ «Դեպի «Չորրորդ Հանրապետություն»» իր ծավալուն հոդվածում գրել է նախագահ Արմեն Սարգսյանը։ Խոսելով բովանդակային պետության կառուցման անխուսափելիության մասին՝ նախագահը նշել է, որ առայսօր բացթողումների պատճառները վերջին երեք տասնամյակների ընթացքում կուտակված և չլուծված խոր արմատական խնդիրների հետևանքն են։
Նրա խոսքերով՝ միակ տրամաբանական և քաղաքակիրթ դեղատոմսը խելամիտ ժամկետներում արտահերթ ընտրություններն են։ «Այո, մենք այսօր տանուլ ենք տվել ռազմի դաշտում և արտաքին ճակատում, որի համար ներկա կառավարությունը պետք է պատասխանատվություն կրի: Սակայն մեզ սպասում են այլ մարտահրավերներ ինչպես երկրի ներսում, այնպես էլ միջազգային ասպարեզում: Որպեսզի պահպանենք մեր պետականությունը և այն դնենք սկզբունքորեն նոր մակարդակի վրա, պետք է մի կողմ դնենք զգացմունքները և սկսենք բարդ, տհաճ, սակայն անհրաժեշտ աշխատանքն առաջին հերթին ինքներս մեզ վրա»,- գրել է նախագահը։
Քաղաքագետ Շիրինյանը, որը մշտապես խոսել է Չորրորդ հանրապետություն ստեղծելու անհրաժեշտության մասին «Առաջին լրատվական»-ի հետ զրույցում ասաց՝ ուրախ է, որ նույնիսկ նախագահը հասկացավ, որ Երրորդ հանրապետությունը «խլամ» է. «Պատերազմը պարտավորեցրեց խոսել։ Դա պետք է ստեղծվի, ուրախ եմ, որ կոնսերվատիվ մտածողությունն ընկալվեց։ Սա նշանակում է, որ գործն առաջ է գնալու, եթե չգնա, ուրեմն Հայաստանի Քրիստոնեա-ժողովրդավարական կուսակցության պլատֆորմի մաս է լինելու ընտրություններից հետո։ Մենք դա անելու ենք՝ ճիշտ այնպես, ինչպես 1959-ին Ֆրանսիայում Դը Գոլը հինգերորդ հանրապետություն հռչակեց»։
Շարունակելով մեր զրուցակիցն ասաց. «Քանի որ նախագահը խոսեց, շատ արագ մտքի ճորտերը կսկսեն խոսել։ Ես այս մասին ասել եմ դեռ Սերժ Սարգսյանի ժամանակ ու այն, անպայման, լինելու է»։
ԳԽ պատգամավոր Ազատ Արշակյանի կարծիքով՝ որպես առաջին քայլ հրաշալի քայլ է։ «Կարծում եմ՝ նաև ճիշտ է ակցիայի անունը՝ Չորրորդ հանրապետություն։ Նախագահը, ըստ Սահմանադրության, խորհրդանշական գործառույթներ ունի, բայց եթե ինքն իրենից հեղինակություն է ներկայացնում՝ իր կենսագրությունով ու գործունեությամբ, շատ բան կարող է անել։ Այս կոչը նաև նրանց է ուղղված, ովքեր իրենց ներքին համոզմունքներով, իրենց կենսագրությունով իրենց համարում են գործունյա և կարող են միանալ այս նախաձեռնությանը»,- «Առաջին լրատվական»-ի հետ զրույցում ասաց նա։
Ըստ Արշակյանի՝ սա նաև թեթևակիորեն սեփական թիմ ձևավորելու հայտ էր «Փաստորեն՝ Չորրորդ հանրապետության կողմնակիցների հավաք հայտարարվեց։ Ես սա ողջունում եմ, համարում եմ դրական և այժմեական։ Կցանկանամ, որպեսզի նախագահն ավելի ակտիվ կազմակերպչական աշխատանքներ տանի՝ իր իսկ առաջարկած Չորրորդ հանրապետություն ծրագրի իրականացման համար»,- եզրափակեց մեր զրուցակիցը։
