Որոնողափրկարարական աշխատանքների արդյունքում այսօր՝ հունվարի 11-ին, Հադրութի, Սղնախի և Ջաբրայիլի ուղղություններից հայտնաբերվել է 10 զինծառայողի և 1 քաղաքացիական անձի աճյուն։ Տեղեկությունը հայտնեց Արցախի արտակարգ իրավիճակների պետական ծառայության տեղեկատվության և հասարակայնության հետ կապերի բաժնի պետ Հունան Թադևոսյանը:
Նրա խոսքով` զինծառայողների աճյունները պետք է ենթարկվեն ԴՆԹ փորձաքննության, իսկ զոհված քաղաքացիական անձի մարմինը հարազատները կարողացել են ճանաչել։
«Քաղաքացիական անձի մարմինը հայտնաբերվել է Հադրութի շրջանի Վարդաշատ գյուղից։ Տղամարդու հարազատները նրա մարմինը ճանաչել են»,–ասաց նա։
Թադևոսյանի խոսքով` որոնողափրկարարական աշխատանքները կշարունակվեն նաև վաղը, սակայն ուղղությունները դեռևս հստակեցված չեն։
Ընդհանուր առմամբ, առայսօր 1222 զինծառայողի և քաղաքացիական անձանց աճյուն է հայտնաբերվել։
Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն են ընդունել ռազմական գործողությունների դադարեցման վերաբերյալ։