Իտալիայի Ա սերիայի 17-րդ տուրի կենտրոնական խաղում երեկ «Ռոման» սեփական հարկի տակ ընդունել էր «Ինտերին»: Հռոմի Օլիմպիական մարզադաշտում կայացած խաղում հաշիվը բացեցին մայրաքաղաքային թիմի ֆուտբոլիստները: Ստանալով Հենրիխ Մխիթարյանի փոխանցումը՝ 17-րդ րոպեին աչքի ընկավ Պելեգրինիին: Երկրորդ կեսում, սակայն, «Ինտերը» ոչ միայն վերականգնեց հաշվի հավասարությունը, այլև առաջ անցավ: Նախ՝ գոլ խփեց Սկիրինիարին, հետո էլ աչքի ընկավ Հակիմին: Խաղավարտին մոտ, սակայն, «Ռոման» կարողացավ խուսափել պարտությունից Մանչինիի գնդակի շնորհիվ:
Հայաստանի ֆուտբոլի ազգային հավաքականի ավագ Հենրիխ Մխիթարյանը «Ռոմայի» մեկնարկային կազմում էր և մասնակցեց ամբողջ խաղին: Այս տուրից հետո «Ռոման» մրցաշարային աղյուսակում 3-րդն է և ունի 34 միավոր: «Ինտերը» 37 միավորով 2-րդն է, իսկ առաջատարը 40 միավորով «Միլանն» է: Հեղինակավոր Whoscored պարբերականի վարկածով՝ Մխիթարյանն այս մրցավեճում արժանացել է միջինից բարձր՝ 6.9 գնահատականի։ Ամենաբարձր՝ 8.1 գնահատական ստացել է առաջին գոլի հեղինակ Պելեգրինին։ «Ռոմայի» երկրորդ գոլի հեղինակ Մանչինին էլ արժանացել է 7.4 գնահատականի։ Բացի գոլերի հեղինակներից՝ Մխիթարյանից ավելի բարձր միավոր է ստացել միայն կիսապաշտպան Վիլլարը՝ 7.4։
Վերլուծելով «Ռոմայի» երեկվա խաղը՝ կարող ենք ասել, որ պորտուգալացի մասնագետ Պաուլու Ֆոնսեկայի թիմը ցուցադրեց ոչ բալանսավորված և ինչ-որ տեղ թափթփված ֆուտբոլ։ Այո, «Ռոմայի» գրոհները սուր էին, բայց խաղային օղակների միջև համագործակցությունն այն չէր։ Խնդիրներ ծագում էին հատկապես «Ռոմայի» պաշտպանության կենտրոնում։ Օդային մենամարտերում «Ռոմայի» պաշտպանները զիջում էին հատկապես «Ինտերի» հարձակման առաջատար Լուկակուին։ Հատկանշական է, որ «Ինտերը» հաշիվը հավասարեցրեց հենց օդային պայքարում «Ռոմայի» պաշտպանների կոպիտ սխալի պատճառով։
Այո, «Ռոման» այս պահին երրորդն է Ա սերիայում, բայց ասել, որ այս թիմն ի զորու է պայքարել չեմպիոնի կոչման համար՝ ճիշտ չի լինի։ Ընթացիկ մրցաշրջանում քիչ չեն հանդիպումները, երբ Ֆոնսեկայի ֆուտբոլիստները ցուցադրել են թույլ ֆուտբոլ։ Կարճ ասած՝ «Ռոմայի» խաղում պակասում է կայունությունը, իսկ խաղային արդյունավետ մոդելը դեռևս վերջնականապես ձևավորված չէ։
Ինչ վերաբերում է Մխիթարյանին, ապա մեր ֆուտբոլիստը ընթացիկ մրցաշրջանում ստանձնել է թիմի առաջատարի դերը։ Ի տարբերություն նախորդ մրցաշրջանի՝ հայ կիսապաշտպանն առանց կաշկանդվելու իր վրա է վերցնում խաղը՝ հետևից տանելով խաղընկերներին։ Գրեթե բոլոր հանդիպումներում Մխիթարյանն իր անմիջական մասնակցությունն է ունենում դրական արդյունքներում և գործողություններում։ Այսօր իսկապես դժվար է պատկերացնել «Ռոման» առանց Հայաստանի ազգային հավաքականի ավագի։
Նույն WhoScored պարբերականը, բարձր գնահատելով Մխիթարյանի խաղը, ուշագրավ զուգահեռ է անցկացրել Մխիթարյանի՝ Պրեմիեր լիգայում և Ա սերիայում ելույթների միջև։ Նշենք, որ Ա սերիայի ընթացիկ մրցաշրջանում Մխիթարյանը 17 հանդիպումներում խփել է 8 և դարձել նույնքան գոլային փոխանցման հեղինակ։ Եվ այսպես, պարբերականը երեկվա հանդիպումից հետո հաշվարկել է այդ առաջնություններում Մխիթարյանի կատարած ընդհանուր գոլային փոխանցումների քանակը:
Եվ այսպես. հայ ֆուտբոլիստը «Մանչեսթեր Յունայթեդում» ու «Արսենալում» ընդհանուր առմամբ 78 հանդիպում է անցկացրել Պրեմիեր լիգայում։ Այդ 78 հանդիպումներում նա դարձել է ընդամենը 14 գոլային փոխանցման հեղինակ: Իսկ ահա «Ռոմայի» կազմում Ա սերիայում մասնակցած 39 հանդիպումներում արդեն իսկ կատարել է 13 գոլային փոխանցում: Մխիթարյանն Իտալիայի նախորդ առաջնությունում կատարել էր 5 արդյունավետ փոխանցում: Մեկնաբանությունները, կարծում ենք, ավելորդ են։
Իտալիայում Մխիթարյանը ցուցադրում է այն ֆուտբոլը, որին սպասում էինք։ Ավելի ստույգ՝ նա խաղադաշտում օգտագործում է իր պոտենցիալի զգալի մասը։ Ընդունենք, որ Մխիթարյանի բացառիկ արագությունը ցայտուն կերպով աչքի չընկավ Անգլիայի Պրեմիեր լիգայում: Մասնավորապես, մի շարք այլ գործոններ թույլ չտվեցին, որ հայ ֆուտբոլիստը գործի դնի իրական ներուժը: Ի տարբերություն Ժոզե Մոուրինյոյի կամ Ունայ Էմերիի՝ Պաուլու Ֆոնսեկան Մխիթարյանից փորձում է քաղել արդյունավետության ողջ արսենալը:
Մրցաշրջանի սկզբից «Ռոմայի» երկրպագուները սոցիալական ցանցերում պահանջում էին, որ ակումբի ղեկավարությունը երկարաժամկետ պայմանագիր կնքի Հենրիխ Մխիթարյանի հետ: Նախօրեին իտալական մամուլում սկսեցին տեղեկություններ շրջանառվել, որ մոտ ապագայում Մխիթարյանը կերկարաձգի պայմանագիրը «Ռոմայի» հետ։