2020 թվականին Լուվրը կորցրել է այցելուների 72%-ը, ահա թե որքան է պակասել Փարիզի թանգարան այցելությունը կորոնավիրուսի համաճարակի պատճառով:
Ինչպես հայտնում է ՏԱՍՍ-ը՝ վկայակոչելով թանգարանի ներկայացուցիչներին, 2020 թվականին Լուվր այցելել է 2,7 միլիոն մարդ, մինչդեռ 2019-ին այդ ցուցանիշը 9,6 միլիոն էր:
2018-ին թանգարանն ընդունել է ռեկորդային՝ 10,2 միլիոն այցելու: «Թանգարանը երկար ժամանակ փակ էր. մարտի 17-ից հուլիսի 6-ը, ապա և՝ հոկտեմբերի 29-ից», – ասաց Լուվրի թանգարանի տնօրեն Ժան-Լյուկ Մարտինեսը։
Նա շեշտեց, որ չնայած դատարկ դահլիճներին, «Լուվրի երկար պատմությունն ապացուցում է, որ բնավ էլ իզուր չէ լավ օրերի սպասումով ապրելը»:
2021 թվականին Լուվրը նախատեսում է բացել մի քանի նորոգված դահլիճ և ներկայացնել նոր ցուցահանդեսներ: Ցուցահանդեսների գրաֆիկը, որը թանգարանը չի հասցրել ցուցադրել, կթարմացվի: