Մամուլում դեռևս չհերքվող տեղեկություններ կան այն մասին, որ հունվարի 11-ին Մոսկվայում հանդիպում է նախատեսված՝ Փաշինյանի, Պուտինի և Ալիևի մասնակցությամբ: Մամուլն արդեն գրում է մոսկովյան օրակարգի մասին, նշվում է, որ Փաշինյանը պատրաստվում է նոր փաստաթղթեր ստորագրել և նոր զիջումների գնալ: Թեմայի շուրջ «Առաջին լրատվական»-ի հետ զրույցում «Հանուն հանրապետության» ԺՊԴԿ ղեկավար մարմնի անդամ Վահագն Մարտիրոսյանը նկատեց, որ հունվարի 11-ի հանդիպումը վարչապետի աշխատակազմը պաշտոնապես ո՛չ հերքել, ո՛չ էլ հաստատել է, ավելին՝ վարչապետի մամուլի խոսնակը հայտարարել է, որ եթե այդպիսի հանդիպում նախատեսված լինի, հասարակությունը կտեղեկացվի:
«Այս դեպքում կարելի է խոսել միայն ենթադրությունների մասին: Եթե նույնիսկ այդպիսի այց լինի, չեմ կարծում, թե որևէ փաստաթուղթ կստորագրվի: Եթե հանդիպում լինի, դա կլինի հայտնի ստորագրված հայտարարության շրջանակներում, այդ հայտարարության չիրականացված կետերի իրականացման կարգը որոշելու և ընթացքում առաջացած խնդիրների, օրինակ՝ գերիների, անհետ կորածների վերաբերյալ: Չեմ կարծում, որ որևիցե փաստաթուղթ կստորագրվի, որի վերնագիրը կլինի պայմանագիր: Եվ չեմ կարծում, որ Փաշինյանը քաղաքական ինքնասպանություն կգործի՝ այս փուլում որևիցե ճակատագրական փաստաթուղթ ստորագրելով: Այնպես որ մամուլում շրջանառվող տեղեկությունները ֆեյք նյուզ են, ես դրանց չեմ հավատում: Կարծում եմ՝ հայտարարության հետ կապված ընթացիկ հարցեր են քննարկվելու»,- նշեց Մարտիրոսյանը:
Վերլուծաբան Աղասի Մարգարյանի դիտարկմամբ՝ եթե Մոսկվայում եռակողմ հանդիպումը կայանա, տրամաբանական է, որ կքննարկվեն հայտարարության բոլոր կետերը՝ սկսած գերիների վերադարձի հարցից մինչև հաղոդակցության ուղիների և ապաշրջափակման հարցը: «Մենք պետք է ընդունենք կայացած փաստը. պետք է ընդունենք, որ մենք պարտվել ենք պատերազմում, բայց դրանով չի ավարտվում կյանքը ՀՀ-ի համար, և չպետք է ձեռքներս ծալած նստենք, ՀՀ պատմության էջը չի փակվում: Դեռ շատ երկար հրատապ գործողություններ են սպասվում՝ սկսած գերիների վերադարձից, սահմանների հստակեցումից մինչև համակեցության կանոնների մշակում: Որպես պետություն, պետք է հասկանանք՝ ինչպես ենք ապրելու, զարգանալու այս տարածաշրջանում»:
Մանրամասն՝ տեսանյութում:
