Նոյեմբերի 10-ի եռակողմ հայտարարության հետագա իրագործման առաջնահերթությունը հայտարարության 8-րդ կետի լիարժեք իրագործումն է՝ ֆեյսբուքյան իր էջում գրել է վարչապետ Նիկոլ Փաշինյանը՝ ընդգծելով, որ ըստ այդմ պետք է տեղի ունենա գերիների, պատանդների և այլ պահվող անձանց, ինչպես նաև մարմինների լիարժեք փոխանակում։ Վարչապետը կարևորել է նաև տեղի ունեցած ռազմական գործողությունների գոտում ծավալուն որոնողափրկարարական աշխատանքների իրագործումը:
Հաջորդ կարևոր հարցը, ըստ Փաշինյանի, տարածաշրջանի բոլոր տնտեսական և տրանսպորտային ենթակառուցվածքների ապաշրջափակումն է, ինչը, վարչապետի փոխանցմամբ, նշանակում է ինչպես Հայաստանի կողմից Ադրբեջանի տարածքով բեռնափոխադրումներ և տրանսպորտային հաղորդակցություն դեպի Ռուսաստան և Իրանի Իսլամական Հանրապետություն, այնպես էլ Ադրբեջանի կողմից Հայաստանի տարածքով բեռնափոխադրումներ և տրանսպորտային հաղորդակցություն դեպի Նախիջևան. «Կրկին ուշադրություն եմ հրավիրում այն փաստի վրա, որ նոյեմբերի 10-ի հայտարարության մեջ չկա ոչ «Մեղրի», ոչ էլ ՀՀ որևէ տարածքի առնչությամբ «միջանցք» արտահայտություն։ Հայաստանից դեպի Ռուսաստան և Ադրբեջանից դեպի Նախիջևան հաղորդակցության երթուղիների ընտրությունը առանձին քննարկման թեմա է, որի արդյունավետության կարևոր պայման է գերիների, պատանդների, այլ պահվող անձանց, զոհվածների մարմինների փոխանակման, ինչպես նաև անհետ կորածների որոնողական աշխատանքների ծավալների և արդյունավետության բարձրացումը»:
Իրանագետ, ՄԱՀՀԻ ասոցացված փորձագետ Էմմա Բեգիջանյանի կարծիքով, մինչդեռ, Փաշինյանի հայտարարությունը՝ ճանապարհների ապաշրջափակման հետ կապված, հստակ չէ։ Իսկ եթե նկատի է առնվում Հայաստանի կողմից Ադրբեջանի տարածքով բեռնափոխադրումներ ու տրանսպորտային հաղորդակցություն դեպի Ռուսաստան ու Իրան, իսկ փոխարենը՝ Ադրբեջանի կողմից Հայաստանի տարածքով դեպի Նախիջևան, ապա դա բնավ համարժեք չէ, և հայկական կողմն այդ քայլին չպետք է գնա: «Այսինքն՝ Հայաստանը ճանապարհ է տալիս, բայց ի՞նչ է ստանում դրա փոխարեն։ Բացի այդ, հստակ չէ, թե որ տարածքով և ինչպես է այդ ճանապարհը տրամադրվելու, որովհետև թուրքական ու ադրբեջանական կողմը բոլորովին այլ պատկերացում ունի։ Ասում են, որ այդ ճանապարհը վերահսկելու են ռուսական խաղաղապահները, բայց դա ինչպես է արվելու՝ հստակ չէ։ Խոսքը նոր ճանապարհի կառուցման մասին է, բայց ես չեմ պատկերացնում, թե ինչու է Հայաստանը դրան համաձայնություն տվել»,- «Առաջին լրատվական»-ի հետ զրույցում ասաց նա։
Մեր զրուցակցի խոսքով՝ եթե Իրանը դրան պաշտոնական առարկություն չի ներկայացրել, դա ամենևին չի նշանակում, թե համաձայն է. «Եթե ողջուներ դա, ապա անպայման կբարձրաձայներ, բայց եթե չի բարձրաձայնում, ապա միանշանակ վերաբերմունք չկա։ Էլ չեմ խոսում այն մասին, որ վերլուծություններում այդ մասին շատ բացասական կարծիքներ կան։ Ըստ ամենայնի՝ կա անհանգստություն այդ հարցի շուրջ, դրա համար էլ Իրանը բանակցեց Ռուսաստանի հետ, Թուրքիայի ու Ադրբեջանի հետ եղան որոշակի քննարկումներ։ Դա հարվածում է առաջին հերթին Իրանին՝ որպես տարանցիկ երկիր։ Այժմ Թուրքիայի բեռները Իրանի տարածքով են գնում Ադրբեջան, իսկ եթե այդ ճանապարհը կառուցվի, ապա արդեն Իրանը դուրս է մնում»։
Էմմա Բեգիջանյանի դիտարկմամբ՝ մենք ամեն ինչ պետք է անենք, որ այդ ճանապարհը չկառուցվի. «Բայց վարչապետի հայտարարություններն էլ բոլորովին հստակ չեն։ Ինքը խոսում է ապաշրջափակման մասին, բայց թուրքական ու ադրբեջանական կողմի կարծիքով՝ նրանք են կառուցելու այդ ճանապարհը, այն լինելու է երկաթուղային, ավտոմոբլիային և այլն… դա շատ բան է նշանակում։ Եվ սա բոլորովին համարժեք չէ նրա հետ, ինչ մեզ է տրվում։ Ես դա չեմ համարում արտոնություն և դրական փաստ։ Ես կարծում եմ, որ Հայաստանը դրան չպետք է համաձայներ։ Դրանք այն աստիճանի համարժեք չեն, որ նույնիսկ չի կարելի համեմատել։ Նայեք իրենց մամուլը, ասում են՝ դա թուրքական աշխարհը միացնող ճանապարհ է։ Ես հարց եմ տալիս՝ դա մեզ ի՞նչ է տալիս, ոչ մի բան։ Մեզ ոչինչ չտվող կետ է»։
Հավելենք նաև, որ ըստ ՌԴ արտգործնախարարության պաշտոնական կայքէջի հրապարակման՝ նոյեմբերի 9-ին ձեռք բերված ՝ Ադրբեջանը Նախիջևանին կապող նոր, այսինքն՝ հատուկ տրանսպորտային կոմունիկացիա է ստեղծվում։ Եվ Նախիջևանի Ինքնավար Հանրապետությունը արևմտյան Ադրբեջանի շրջաններին կապող միջանցքները, ըստ փաստաթղթի, մեկը չեն. նշվում է հոգնակի թվով։