Նախօրեին հայկական ֆուտբոլում տեղի ունեցավ իրադարձություն, որը տրամաբանելը կամ մեկնաբանելը բավական դժվար է։ Մեր ամենաուժեղ ակումբներից՝ «Ալաշկերտի» գլխավոր մարզիչ Եղիշե Մելիքյանը հեռացավ զբաղեցրած պաշտոնից՝ գլխավորելով «Փյունիկը»։ Մինչդեռ, անցյալ տարվա դեկտեմբերի 14-ին ակումբը հայտնել էր, որ «Ալաշկերտը» երկարաձգել է պայմանագիրը գլխավոր մարզիչ Եղիշե Մելիքյանի հետ: 41-ամյա մասնագետի գլխավորությամբ թիմն առաջնության աշնանային հատվածից հետո 18 միավորով առաջատարների թվում է: Մելիքյանը ակումբի գլխավոր մարզչի պաշտոնը ստանձնել էր ընթացիկ տարվա հունիսի 28-ին:
Մինչ այդ Մելիքյանը գլխավորում էր Ուկրաինայի բարձրագույն լիգան ներկայացնող «Լվովը» և դասվում էր ուկրաինական ֆուտբոլի ամենահեռանկարային մասնագետների շարքում։ Մելիքյանն ունի Ֆուտբոլիստի հարուստ կենսագրություն։ Կարիերայի ընթացքում նա հանդես է եկել հայկական մի շարք ակումբներում` դառնալով Հայաստանի չեմպիոն, գավաթակիր և մեդալակիր, հաջողությամբ ներկայացրել է Ուկրաինայի «Մետալուրգ» (Դոնեցկ), «Ստալ», «Զարյա», «Կրիմտեպլիցա» և «Հովերլա» թիմերը: Դոնեցկը ներկայացնող ակումբի կազմում դարձել է Ուկրաինայի առաջնության բրոնզե մեդալակիր: Հայաստանի ազգային հավաքականի կազմում ձախ եզրայինի դիրքում հանդես եկած Եղիշե Մելիքյանը անցկացրել է 30 հանդիպում։ Թե ինչով է պայմանավորված Մելիքյանի հեռանալն «Ալաշկերտից» դժվար է ասել։ Ինչ խոսք տարաձայություններ և անհամաձայնություններ կարող են լինել բոլոր ակումբներում, բայց․․․։ Զարմանալին թերևս միայն Եղիշե Մելիքյանի հեռանալը չէ։
Նրան փոխարինել է Աբրահամ Խաշմանյանը։ Վերջինիս գլխավորությամբ հայկական թիմը երկու անգամ հռչակվել է Հայաստանի չեմպիոն, մեկական անգամ` Հայաստանի գավաթակիր և սուպերգավաթակիր, զգալի հաջողությունների է հասել եվրոպական մրցասպարեզում: Իսկ քանի՞ անգամ է Աբրահամ Խաշմանյանը նշանակվել «Ալաշկերտի» գլխավոր մարզիչ ապա հեռացել այդ պաշտոնից։ Երեք, չորս, միգուցե հինգ։ Հաշվելն իսկապես բարդ է։ Այո, «Ալաշկերտը» մեր կայացած և մարտունակ թիմերից է, բայց այն ինչ տեղի է ունենում այս թիմում կապված մարզիչների հետ ոչ այլ ինչ է, քան ֆուտբոլային «աջաբսանդալ»։ Իհարկե, ակումբը մասնավոր սեփականություն է և մեծ հաշվով ղեկավարությունն է որոշում ում վստահել թիմի ղեկը։ Բայց արդյոք երկրպագուները կարող են լուրջ վերաբերվել ակումբին, որը շարունակ հեռացնում է նույն գլխավոր մարզչին, ապա նրան նորից վերանշանակում։ Արդյո՞ք երկրպագուները լուրջ կվերաբերվեն մի ակումբի, որը պայմանագիր կնքելուց հետո հեռացնում է մի մարզչի, որը թողնելով ուկրաինական ակումբը վերադարձել էր հայրենիք և շոշափելի արդյունք գրանցել։
Հարցերի պատասխանը թողնում ենք երկրպագուներին։ Հարկ ենք համարում միայն հաջողություն մաղթել Աբրահամ Խաշմանյանին և Եղիշե Մելիքյանին մրցաշրջանի գարնանային հատվածում։
