2020 թվականը ծանր տարի էր ամբողջ աշխարհի՝ հատկապես Հայաստանի համար․ համավարակ, հետո պատերազմ, հիմա էլ ներքաղաքական ճգնաժամ և բազում մարտահրավերներ։
Ի՞նչ թողեցինք 2020-ում, և ի՞նչ բեռով ենք գնում 2021 թվական․ «Առաջին լրատվական»-ի հարցին քաղաքագետ Էմիլ Օրդուխանյանը պատասխանեց․ «2020 թվականը իսկապես ծանրագույն տարի էր ինչպես մեր պետության, մեր ժողովրդի, այնպես էլ, առհասարակ, մեր ազգային գիտակցության ու ինքնության համար։ Տարեսկզբին համավարակի պատճառով արգելակվեց բնականոն կյանքը, և բոլոր ոլորտները, կարծես, կանգնեցին վերապրոֆիլավորվելու, մեխանիզմներ մշակելու առաջ։ Մասամբ հաջողվեց, մասամբ եղան նաև անհաջողություններ, բայց, թերևս, այդ իմաստով այդ մարտահրավերը, որն ուղղված էր ոչ միայն մեր պետությանը, այլ նաև ամբողջ աշխարհին, ինչ-որ չափով հաղթահարել եղավ։ Համավարակի պատճառով ունեցանք նաև մեծ թվով մահվան դեպքեր, բայց հուսադրող էր նաև այն, որ առողջացողների թիվը համեմատաբար շատ ավելին էր։ Այսինքն՝ թե՛ առաջին ալիքի, թե՛ երկրորդ ալիքի դեպքում մեզ հաջողվեց հնարավորինս համապատասխանեցնել մեր ենթակառուցվածքները, որպեսզի կարողանանք հնարավորինս դիմագրավել։
Ավելի բարդ իրավիճակը պայմանավորվեց մեր պետական սահմանի, մեր հայրենիքի անվտանգության խնդրով։ Հուլիսին ունեցանք ոգևորիչ հաջողություն Տավուշում, բայց, ցավոք սրտի, սեպտեմբերի 27-ին սանձազերծվեց պատերազմ, որի ժամանակ մենք ունեցանք կորուստներ՝ մարդկային, տարածքային։ Սա ամենացավալի իրողությունն էր, բայց, միևնույն ժամանակ, չպետք է մոռանանք, որ պատմության ընթացքում մենք նման վայրէջքներ ունեցել ենք, որոնց հաջորդել են վերելքները»։
Մանրամասները՝ տեսանյութում։
