Շիրակի մարզը Արցախյան պատերազմի առաջին օրվանից ՝սեպտեմբերի 27-ից ընդունել է 2531 արցախցիների, նրանց մի մասը վերադարձել է, իսկ մյուսները դեռ շարունակում են ապրել Գյումրիում ու մարզի այլ համայնքներում։ Բնակության խնդիրներից բացի այս պահին արցախցի ընտանիքների զբաղվածության ապահովումը համարվում է առաջնահերթություն։
«Մենք ունենք հասարակական աշխատանք ծրագիր,հիմա այդ ծրագիրը նոր ձևաչափով ենք իրականացնելու հատուկ արցախահայերի համար, զբաղվածության վարձատրվող հասարակական աշխատանք ծրագիրը պետք է իրականացնենք և մինչև հունվարի 15-ը համայնքները պետք է ներկայացնեն մարզպետարան իրենց բնակավայրերում գտնվող արցախցիների տվյալները, որպեսզի նրանք ընդգրկվեն այս ծրագրում»,-նշում է Գյումրիի զբաղվածության կենտրոնի տնօրեն Ամալյա Ադամյանը:
Ըստ զբաղվածության տարածքային կենտրոնի տնօրենի, ծրագրի իրականացման համար պետբյուջեից հատկացվել է երկու միլիոն դրամ, իսկ աշխատանքի դիմաց օրավարձը կլինի բարձր:
«Օրավարձը սահմանված է 8000 դրամ, ոլորտները,որում ընդգրկվելու են արցախցիները նույնն են մնացել, այս տարի ավելացել են նաև ձնամաքրման աշխատանքները, որպեսզի ձմռան սեզոնին նույնպես ապահովենք նրանց զբաղվածությունը»,-ասում է Ամալյա Ադամյանը:
Բացի հասարակական աշխատանք ծրագրից, արցախցիների համար կիրականացվի ևս մեկ ծրագիր, որը նախկինում նախատեսված էր երիտասարդների համար, ովքեր ցանկանում էին մասնագիտանալ այլ ոլորտներում:
«Մասնագիտություն ունեցող,բայց այլ ոլորտում մասնագիտանալ ցանկացող մեր արցախցի բարեկամներին մենք 3 ամսով կուղղորդենք այլ աշխատանքի, որի համար իրենք ամսական կստանան հարյուր հազարական դրամ աշխատավարձ:Ծրագրում ընդգրկվելու ամենակարևոր հանգամանքն այն է, որ նրանք պարտադիր պետք է ընդգրկված և հաշվառված լինեն զբաղվածության տարածքային կենտրոններում »,- պարզաբանում է Գյումրիի զբաղվածության կենտրոնի տնօրենը։
Շիրակի մարզում ապրող ու Արցախ չվերադարձած քաղաքացիների ժամանակավոր զբաղվածության խնդիրը կարգավորելու համար սկսվել են նաև նրանց կարգավիճակի հստակեցման գործընթացները՝ պարզելու, թե մինչ պատերազմը, ովքեր են ունեցել աշխատանք, ովքեր են զրկվել մշտական աշխատանքից, գործազուրկ համարվում են թե ոչ:Այս հարցերի ճշգրտման համար Հանրապետության զբաղվածության տարածքային կենտրոնները համագործակցում են արցախցի գործընկերների հետ: