Հայկական ֆուտբոլում անցնող տարում գրանցված գլխավոր հաջողություններից էր մեր ազգային թիմի հաղթանակը Եվրոպայի առաջնության ընտրական փուլի փլեյ-օֆֆում։ Մենք Եվս մեկ քայլ արեցինք դեպի Ֆուտզալի Եվրոպայի առաջնության եզրափակիչ փուլ։ Հիշեցնենք, որ դեկտեմբերի 9-ին Բուլղարիայի Վառնա քաղաքի սպորտի և մշակույթի պալատում մեր հավաքականը 3։1 հաշվով հաղթել էր Բուլղարիային։ Փլեյ-օֆֆի առաջին խաղում էլ մերոնք առավելության էին հասել 4։0 հաշվով։Որակավորման խմբային փուլում մեր թիմն ընդգրկվել է 2-րդ խմբում և կմրցի Ռուսաստանի, Ֆրանսիայի և Վրաստանի հավաքականների հետ։ Արդեն հունվարի 28-ին Հայաստանի հավաքականը ուժերը կչափի Ռուսաստանի հետ։ Հիշեցնենք, որ մեր հավաքականին երբևէ չի հաջողվել հանդես գալ որակավորման խմբային փուլում։ Ուստի, մերոնց մեկնարկը կարևորագույն այս մրցաշարում կարելի է համարել հունվարի մարզական գլխավոր իրադարձություն։ Այո, առաջիկայում մեր հավաքականին սպասվում է շատ ավելի լուրջ փորձություն։
Որակավորման խմբային փուլում թույլ մրցակիցներ այլևս չկան։ Նույն Ռուսաստանի հավաքականն ուժեղագույններից է ոչ միայն Եվրոպայում, այլև աշխարհում։ Որակավորման խմբային փուլում 8 ենթախմբերում առաջին հորիզոնականը զբաղեցրած հավաքականներն իրավունք կստանան մասնակցելու Եվրոպայի առաջնության եզրափակիչ փուլին։ Եզրափակիչ փուլի ուղեգրեր կստանան ենթախմբերում երկրորդ հորիզոնականները զբաղեցրած լավագույն արդյունք ցույց տված ևս 6 հավաքականներ։ Մյուս երկու հավաքականները փլեյ-օֆում կվիճարկեն ևս մեկ ուղեգիր։ Եվրոպայի առաջնության եզրափակիչ փուլ որակավորման սկզբունքով դուրս կգան 15 հավաքականներ, որոնց կմիանա կազմակերպիչ երկրի ազգային թիմը։ Ի դեպ, մեր ենթախմբում արդեն իսկ կայացել է մեկ հանդիպում։ Վրաստանի ընտրանին ոչ-ոքի՝ 4։4 է խաղացել Ֆրանսիայի հետ։ Սա մեզ համար ձեռնտու արդյունք կարելի է համարել։ Որակավորման խմբային փուլին ընդառաջ հարկ ենք համարում վերհիշել մեր հավաքականի անցած ուղին։ Ամփոփելով Հայաստանի հավաքականի մրցելույթը ընտրական փուլում՝ այն կարող ենք որակել փայլուն։ Վաստակելով 4 միավոր՝ մեր հավաքականը ընտրական փուլում B ենթախմբում զբաղեցրել էր 2-րդ հորիզոնականը։ Առաջին տուրում Հայաստանի հավաքականը 2։5 հաշվով զիջել էր Բելգիային, այնուհետև 3։1 հաշվով առավելության հասել Չեռնոգորիայի ընտրանու նկատմամբ։ Վճռորոշ 3-րդ տուրում երկրորդ հորիզոնականն ապահովագրելու համար մերոնց անհրաժեշտ էր առավելության հասնել ենթախմբի ընդգծված հետնապահ Շոտլանդիայի նկատմամբ։ Այս հավաքականն առաջին տուրում Չեռնոգորիային 9։2 հաշվով զիջելուց հետո երկրորդ տուրում 7։3 հաշվով զիջել էր Բելգիային։
Մեր հավաքականի հաղթանակը կասկած չէր հարուցում։ Բուքմեյքերները Հայաստանի հաղթանակի համար սահմանել էին 1.05 գործակից, բայց… Մեր ֆուտբոլիստները անսպասելիորեն ցուցադրեցին անվստահ խաղ։ Հաղթանակի նկատմամբ վստահությունն ուղղակի թույլ չտվեց Հայաստանի հավաքականին տրամադրվել և խաղալ գոնե իր հնարավորության սահմաններին մոտ։ Հանդիպումն ավարտվեց ոչ-ոքի՝ 2։2։ Ընդ որում, շոտլանդացիները երկու անգամ առաջ անցան հաշվի մեջ, և մերոնք հետապնդողի դերում էին։ Նշենք, սակայն, որ ողջ հանդիպման ընթացքում Հայաստանի հավաքականը թելադրողի դերում էր, իսկ շոտլանդացիները կազմակերպեցին ընդամենը 5-6 վտանգավոր գրոհ, որոնցից երկուսն ավարտվեց դարպասի գրավումով։
Խաղալով արդար խաղի կանոններին համապատասխան՝ Հայաստան-Շոտլանդիա հանդիպումից հետո Բելգիայի ընտրանին, որն արդեն ապահովել էր առաջին հորիզոնականը, 5։1 հաշվով հաղթեց Մոնտենեգրոյին՝ Հայաստանի հավաքականի համար ապահովելով երկրորդ հորիզոնականը։
