«2020-ը դաջվել է մեր հիշողության մեջ, և այդ դաջվածքը մնալու է, ու չի ստացվելու դուրս գալ զգացմունքային դաշտից, քանի որ մենք ունեցանք հսկայական կորուստներ և՛ պատերազմի, և՛ կորոնավիրուսի պատճառով»,- ամփոփելով 2020 թվականը՝ «Առաջին լրատվական»-ի հետ զրույցում ասաց վերլուծաբան Աղասի Մարգարյանը:
Նրա խոսքով՝ ավելի ռացիոնալ դիտարկելու դեպքում, սակայն, 2020 թվականը որոշակի փորձության և վերամեկնարկը ձևակերպելու տարի էր. «2020-ին մեր պետությունը կանգնեց ահռելի փորձությունների առաջ. դա պատերազմն էր՝ իր հետևանքներով, իսկ այդ հետևանքները ի ցույց դրեցին, որ վերջին 25-30 տարում մեր պետությունը դեռևս չի կարողացել ստեղծել դիմադրողականության պաշար և՛ արտաքին և՛ ներքին մարտահրավերներին դիմակայելու համար: Կարծում եմ՝ սա պետք է լինի ելակետը՝ հասկանալու համար, թե 2021-ը և հաջորդող տարիները որտեղից պետք է սկսենք»:
Մեր զրուցակիցը նշեց, որ մեծ իրադարձությունները՝ հեղափոխությունները, պատերազմները, համաճարակները, ստեղծում են ստարտային ցատկահարթակներ. «Փոխվել է իրականության, մեր պետականության մասին բոլորիս պատկերացումները, բայց դեռևս, գոնե իմ մտապատկերում, ձևակերպված չէ, թե մենք ինչպես ենք շարունակելու, այսպես ասած, մեր երթը դեպի ապագան: 2021 թվականը պետք է լինի այդ ճշգրտումների տարին»:
Մանրամասն՝ տեսանյութում:
