«2020-ը մեր անկախ հանրապետության կենսագրության ողջ ընթացքում ամենաաղետալի տարին էր: Նման ջախջախիչ պարտությունը, որ մենք կրեցինք այս տարվա ընթացքում և մեր խելքից, հուսամ՝ երբեք չի կրկնվի մեր պատմության մեջ: Հուսամ՝ կհասկանանք, որ մենք ունենք ամենակարևորը՝ պետությունը. Հայաստանի անկախ Հանրապետությունը դեռ կա»,- «Առաջին լրատվական»-ի հետ զրույցում ամփոփելով անցնող տարին՝ ասաց իրավապաշտպան Վարդան Հարությունյանը:
Նա հույս հայտնեց, որ մենք մեզ պարտության հասցրած անհեռատեսությամբ, անպատասխանատվությամբ շատ ավելի մեծ փորձությունների չենք տանի պետությունը և չենք վտանգի այն. «Հուսամ, որ 2021 թվականին մենք կունենանք խոհեմ իշխանություն և իշխանավոր, իշխանավոր, որը չի վախենա քննադատությունից, չի լինի պոպուլիստ, չի գնա ականջահաճո ելույթների հետևից, այլ պատրաստ կլինի թիրախավորվելու, բայց կկարողանա լուծել մեր փոքրիկ պետության առջև դրված խնդիրները, և 2021-ի դեկտեմբերին կարձանագրենք որոշակի հաջողություններ»:
Վարդան Հարությունյանը անխուսափելի է համարում քաղաքական արտահերթ զարգացումները. «2021 թվականը թելադրելու է այդ զիջումը, որքան էլ կառչած մնանք մեր աթոռներին: 2021-ին պետք է քվեարկենք ոչ թե պոպուլիստական ելույթի, այլ ծրագրերի օգտին, սառը դատողությամբ»:
Ինչ վերաբերում է պատերազմի, թե խաղաղության գաղափարի շուրջ համախմբմանը նվիրված քննարկումներին, իրավապաշտպանը նկատեց, որ պատերազմի գաղափարը աշխարհի որևէ ժողովրդի մեծ հաջողություններ չի բերել. «Ժամանակավոր հաջողություններ լինում են, բայց վերջին հաշվով պատերազմի գաղափարը բերում է պարտության»:
Մանրամասն՝ տեսանյութում: