2020 թվականը շատ ծանր, շոկային տարի էր՝ ծանր կորուստներով ու նորանոր մարտահրավերներով։ Շատերի կարծիքով՝ ամբողջ խնդիրն այն էր, որ մենք կառավարման ճգնաժամային իրավիճակների կառավարիչներ չունեինք։
Որո՞նք են 2021 թվականի մեր անելիքները ճգնաժամային իրավիճակներում՝ կառավարման տեսանկյունից․ «Առաջին լրատվական»-ի հարցին կառավարման փորձագետ Սերոբ Անտինյանը պատասխանեց․ «Մենք ոչ միայն չունեինք ճգնաժամային կառավարիչներ, այլ ընդհանրապես կառավարիչներ չունեինք, հիմա էլ չունենք։ Թերևս, պատերազմից առաջ պետական կառավարման համակարգի արատները չէին երևում, որովհետև դրանք ոլորտային էին, դրանք աննկատ էին մնում։ Պատերազմը, որ ընդգրկեց հասարակությանը՝ գլոբալ առումով, և լակմուսի թղթի պես վեր հանեց բոլոր այդ խնդիրները, առաջին հերթին ցույց տվեց պետական կառավարման համակարգի անկարողությունը և անզորությունը։
Եթե փորձենք դետալներով անալիզ անել, ապա պատերազմը մի ֆորս-մաժորային իրավիճակ է, երբ պետական կառավարման համակարգն իր ամբողջ թափով և իր ամբողջ ծավալով պետք է մեկ խնդիր լուծի, դա պետության ռազմական, տնտեսական ու մարդկային ներուժի մոբիլիզացիան է և այդ ներուժի օգտագործումը պատերազմում, ինչը տեղի չունեցավ։ Մենք ունեցանք զորահավաքային պլանի շատ վատ իրագործում, որը, ըստ էության, տեղական ինքնակառավարման մարմինների թերությունն էր։ Մենք ունեցանք պաշտպանական համակարգերի ոչ պատշաճ գործողություն, այսինքն՝ զինված ուժերի պլանի հետ կապված։ Մենք ունեցանք մոբիլիզացիոն ռեսուրսի ոչ պատշաճ հավաքագրում և, ըստ էության, սխալ հասցեական կիրառում, որը նույնպես պետական կառավարման համակարգի խնդիրն էր։ Տեղեկատվական առումով էլ մենք ունեցանք լրջագույն կորուստներ, հասարակության մեջ ունեցանք իրապես տեղեկատվական շոկեր, ինչը բերեց պետական ինստիտուտների հանդեպ վստահության անկման։ Սա պետական կառավարման համակարգի անգործության կամ թերի գործունեության արդյունք է»։
Մանրամասները՝ տեսանյութում։