Ամերիկյան Վիրջինիա նահանգի բնակչուհի Էլիսոն Քեյթին տուգանել են այն բանի համար, որ նրա 11-ամյա դուստրը օգնել է փայտփորիկի ճուտիկին: Այս մասին հաղորդում է WUSA TV-ն՝ նշելով, որ տուգանքի գումարը կազմել է 535 դոլար: Հայտնի է, որ Էլիսոն Քեյփոյի դուստրը՝ Սքայլարը գտել էր փոքրիկ ձագուկին իր հոր տան մոտ: Փոքրիկ աղջիկը խլել էր նրան կատվի ճանկերից, տարել իր տուն և խնամել ճուտիկին:
Սքայլարը որոշել է այն մի քանի օր պահելուց հետո բաց թողնել: Տուն գնալու ճանապարհին նրանք մտել են «անտառային ձայներ»՝ կեր գնելու համար, որտեղ բնապահպանական կազմակերպության մի աշխատակցուհի տեսել է թռչնին երեխայի ձեռքում և զգուշացրել Սքայլարին և նրա մորը, որ իրենց նահանգում փայտփորիկները գտնվում են պետության պաշտպանության տակ:
Չնայած հենց նույն օրը ճուտիկին բաց էին թողել, բայց Էլիսոնը շուտով ստացել է դատարան ներկայանալու ծանուցագիր: Հիշեցնենք նաև, որ մի քանի օր առաջ մենք ներկայացրել էինք նմանատիպ մի դեպք, որը կապված էր ոզնու հետ՝ այս անգամ Եվրոպայում: Շվեդիայում դատի էին տվել մի շվեդուհու, ով անտառից ոզնուն բերել էր իր տուն՝ խնամելու համար: