Պատերազմը ցույց տվեց, թե որքան խոցելի են նաև մեր տեղեկատվական «բնագծերը», պարտվել ենք նաև ինֆորմացիոն դաշտում: Պարզվեց, որ հակառակորդը լավագույնս ուսումնասիրել է նաև մեր փսիխոտիպը, և այդ ուսումնասիրության հիման վրա բազմաթիվ ռումբեր է պայթեցնում նաև տեղեկատվական պատերազմում:
«Առաջին լրատվական»-ի հետ զրույցում անդրադառնալով այս դիտարկմանը՝ կիբերանվտանգության մասնագետ Անահիտ Պարզյանը նշեց, որ վաղուց արդեն պատերազմները տեղափոխվել են նաև տեղեկատվական դաշտ:
«Մենք, ցավոք, բավականին հեշտ ենք տրվում այդ խնդիրներին և պառակտում է առաջանում: Մեր հասարակությունը պետք է վերանայի իր մոտեցումները: Այսինքն՝ այն տեղեկատվությունը, որ նետվում է համացանց, պետք է նախ վերլուծվի՝ ինչու ենք կարդում, ով է այդ տեղեկատվության ներբեռնողը, ինչպիսի իրադրությունում է այն ներբեռնվել: Մեր հասարակությունը պետք է քննադատաբար մոտենա ցանկացած տեղեկատվության»,- ասաց Պարզյանը:
Սոցիալական ցանցերը գործիքներ են, որոնք շատ ավելի հեշտ են դարձնում տեղեկատվական պատերազմը: «Թռուցիկները» հիմա հակառակորդի բնակչության շրջանում տարածվում են համացանցի միջոցով: Շատ դժվար է հիմա բացահայտել աղբյուրը, ճշմարտությունը, տարբերել թացը չորից, և սա էլ խուճապ է առաջացնում: Կան տարբեր տեխնոլոգիաներ: Կան տեխնոլոգիաներ, որոնք պառակտում, բևեռացում են բորբոքում, կան տեխնոլոգիաներ, որոնք ազդում են մարդկանց հոգեվիճակի վրա: Երբ որ մարդը էմոցիոնալ ավելի թույլ դաշտում է գտնվում, շատ հեշտ է ազդել նրա վրա, և տեղեկատվության երկրորդ ալիքը ավելի հեշտ կառավարելի և ուղղորդվող է դարձնում մարդկանց»,- նշեց կիբերանվտանգության մասնագետը:
Մանրամասն՝ տեսանյութում
