Աբովյան-Երևան միջքաղաքային հանրային տրանսպորտը միշտ աշխատել է կանոնավոր ռեժիմով և այլ քաղաքների ու մայրաքաղաքի միջև կապ ստեղծող տրանսպորտից համեմատաբար լավ։ Սակայն օրերս դադարեցվել է միջքաղաքային երթևեկը ապահովող բոլոր երեք՝ 262, 261, 267 համարի երթուղայինների աշխատանքը։ Այժմ գործում է միայն 259 համարի ավտոբուսը։
Այս փոփոխությունը կաթվածահարել է կապը մայրաքաղաքի հետ և մեծ բարդություններ ստեղծել այն աբովյանցիների համար, ովքեր, հույսը դնելով կանոնավոր աշխատող տրանսպորտի վրա, աշխատանքի էին անցել մայրաքաղաքում։
Ինչպես հայտնում է տրանսպորտի և կապի նախարարության մամլո քարտուղար Ս.Տոնոյանը, նշված երթուղայինների աշխատանքը դադարեցնելը կապված է Երևանի քաղաքապետ Կարեն Կարապետյանի որոշման հետ՝ թեթևացնել մայրաքաղաքի ծանրաբեռնված երթևեկությունը։ Այս փոփոխությունը, սակայն, բարկացրել է Աբովյան քաղաքի բնակիչներին։ «Երևանցիները իրենց երթևեկության խնդիրները փորձում են լուծել աբովյանցիների հաշվին»,- մեզ հետ զրույցում ասում է Աբովյանի փոխքաղաքապետ Մանուկ Հակոբյանը։
Փոխքաղաքապետը անհանգստություն հայտնեց, որ եթե հարցը չլուծվի մինչև սեպտեմբեր, դա ծանրահեղ վատ անդրադարձ կունենա քաղաքի ուսանողության վրա, որի առջև կկանգնի համալսարան հասնելու ամենօրյա խնդիրը։ Ինչպես հայտնում է Մ.Հակոբյանը՝ Աբովյանի քաղաքպետարանը խնդրով դիմել է Երևանի քաղաքապետարան, սակայն հարցին լուծում տալու որևէ պատասխան կամ խոստում չի ստացել։
Երևանի քաղաքապետարանից հայտնում են, որ խնդիրը իրենց վերահսկողության տակ չէ, և միջքաղաքային տրանսպորտով զբաղվում է միայն տրանսպորտի և կապի նախարարությունը։ «Երևանի երթևեկությունը թեթևացնելու համար պետք է այլ քաղաքներից եկող երթուղայինները ունենան վերջնակետ մայրաքաղաքի կենտոնից դուրս։ Այժմ ընթանում են քննարկումներ, թե որտեղ պետք է լինի Աբովյանի երթուղայինների վերջնակետը»,- հայտնում է մեզ տրանսպորտի և կապի նախարարության մամլո քարտուղար Ս.Տոնոյանը։
