Թուրքիայի մեջլիսի գլխավոր խորհրդում ընդունվել է Թուրքիայի և Ադրբեջանի միջև արտոնյալ առևտրի համաձայնագրի վերաբերյալ օրենքի նախագիծը, տեղեկացնում է ermenihaber.am-ը:
Խորհրդարանի «Ազգայնական շարժում» (ԱՇԿ-MHP) ազգայնամոլական կուսակցության պատգամավոր Յաշար Քարադաղը, անդրադառնալով օրենքի նախագծին, ընդգծել է, որ թուրք-ադրբեջանական հարաբերությունները բազմավեկտոր են և գտնվում են ռազմավարական բարձր մակարդակի վրա:
Նրա խոսքով՝ Թուրքիայի և Ադրբեջանի միջև հարաբերություններում ամենակարևոր շարժիչ ուժը ակտիվորեն շարունակվող փոխադարձ բարձր մակարդակի այցերն են:
Քննարկմանը ելույթ է ունեցել նաև Թուրքիայում գլխավոր ընդդիմադիր ուժ համարվող քեմալական «Ժողովրդահանրապետական» կուսակցության պատգամավոր Մահիր Փոլաթը՝ տեղեկացնելով, որ վերոհիշյալ համաձայնագրով երկու երկրները 15 անուն ապրանքատեսակի վերաբերյալ փոխադարձ արտոնյալ սակագներ են սահմանել: