Գերմանիայի կառավարության Մարդու իրավունքների և հումանիտար օգնության հարցերով պատասխանատու Բարբել Քոֆլերը կոչ է արել Թուրքիայի դատական համակարգին անմիջապես իրականացնել Մարդու իրավունքների եվրոպական դատարանի բոլոր որոշումները։
Ինչպես հաղորդում է թուրքական Gazete Duvar լրատվական կայքը, Գերմանիան հանդես է եկել կոչով՝ Թուրքիայի քրդամետ ժողովուրդների դեմոկրատական կուսակցության նախկին նախագահ Սելահաթթին Դեմիրթաշին անմիջապես ազատ արձակելու վերաբերյալ որոշման հրապարակումից հետո։
«ՄԻԵԴ-ը հաստատեց, որ Թուրքիայում Սելահաթթին Դեմիրթաշի բանտարկությունը հիմնված է քաղաքական դրդապատճառների վրա։ Դատարանի վճիռը պարզ է, նա պետք է ազատ արձակվի։ Կոչ եմ անում Թուրքիայի դատական համակարգին անմիջապես իրականացնել ՄԻԵԴ-ի բոլոր որոշումները»,- գրել է Քոֆլերը Թվիթերի իր միկրոբլոգում։
ՄԻԵԴ-ի՝ Սելահաթթին Դեմիրթաշին ազատ արձակելու որոշումը կայացվել է դեկտեմբերի 22-ին։ Դեկտեմբերի 23-ին Թուրքիայի նախագահ Ռեջեփ Թայիփ Էրդողանը, անդրադառնալով ՄԻԵԴ-ի որոշմանը, նշել է, որ ՄԻԵԴ-ը այդպիսի որոշում կարող է կայացնել, միայն այն դեպքում, երբ Թուրքիայի Սահմանադրական դատարանը ամբողջովին սպառի իրեն։
Ավելի վաղ Գերմանիայի եվրոպական հարցերով պետքարտուղար Մայքլ Ռոթը հայտարարել էր, որ ՄԻԵԴ-ի որոշումների անհապաղ իրականացումը ոչ թե պարզապես ցանկություն է, այլ Թուրքիայի, որպես ԵԽ անդամ, պարտավորություններից մեկն է։