Ազատ ոճային ըմբիշ Վազգեն Թևանյանը երեկ երեկոյան դարձավ աշխարհի գավաթի անհատական խաղարկության ոսկե մեդալակիր։ Սա փայլուն հաջողություն է։ Բելգրադում ընթացող մրցաշարի եզրափակչում Թևանյանը գոտեմարտեց Հունգարիայի ներկայացուցիչ Իսմայիլ Մուսուկաևի դեմ և 9։1 հաշվով հաղթանակ տոնեց։Եզրափակչի ճանապարհին ևս Եվրոպայի՝ մինչև 23 տարեկանների չեմպիոնը վստահ հաղթանակներ էր տոնել։ Որակավորման փուլում Թևանյանը 6։0 հաշվով պարտության էր մատնել Մոլդովայի ներկայացուցիչ Նիկոլայ Գրահմեզին, 1/8 եզրափակչում հաղթել էր Հաջի Մոհամեդ Ալիին (Բահրեյն)՝ 11։0, 1/4 եզրափակչում 10։0 հաշվով առավելության էր հասել ռումինացի Նիկոյալ Օխլոպկովի նկատմամբ, իսկ եզրափակչի ուղեգրի համար գոտեմարտում 7։2 հաշվով հաղթել էր Ուկրաինայի ներկայացուցիչ մեր հայրենակից Գոռ Հովհաննիսյանին։
Փաստորեն, Թևանյանը աշխարհի գավաթի խաղարկության բոլոր գոտեմարտերում հաղթանակի հասավ խոշոր հաշվով, ինչը բացառիկ արդյունք է։ Սա Հայաստանի ազատ ոճի ըմբշամարտի հավաքականի երրորդ մեդալն է Աշխարհի գավաթի խաղարկությունում․ նախօրեին արծաթե մեդալ էր նվաճել Արսեն Հարությունյանը (57 կգ), իսկ Արման Անդրեասյանը (70 կգ) դարձել էր բրոնզե մեդալակիր։Հիշեցնենք նաև, որ ավելի վաղ հունահռոմեականներից Աշխարհի գավաթում արծաթե մեդալակիր է դարձել Մալխաս Ամոյանը (72 կգ), իսկ Սլավիկ Գալստյանը (63 կգ) նվաճել էր բրոնզե մեդալ: Ինչևէ, Թևանյանի պարգևատրման արարողության ժամանակ տեղի ունեցավ մի երևույթ, որը ոչ այլ ինչ էր, քան ադրբեջանական մառազմ։ Մասնավորապես, պարգևատրման արարողության ընթացքում հնչեց ՀՀ պետական օրհներգը և մեր ըմբիշը պարգևատրվեց ոսկե մեդալով: Երրորդ հորիզոնականը զբաղեցրած ադրբեջանցի ըմբիշ Հաջի Ալիևը խախտելով մարզական բոլոր կանոնները չներկայացավ պարգևատրմանն՝ իր փոխարեն ուղարկելով մարզական բժշկին:
Ավելին, ադրբեջանցի բժիշը չցանկացավ լուսանկարվել պատվո հարթակում գտնվող մեդալակիրների հետ։ Փաստորեն, ադրբեջանցիները մարզական միջոցառումը կրկին օգտագործեցին որպես քաղաքական հարթակ։ Օգտագործեցին, քանզի դեռևս հեռու են մարդկային պարզ գիտակցությունից։ Ավելի բարձր գաղափարների մասին խոսելը կարծում ենք ավելորդ է։ Ադրբեջանցիները փորձում են թշնամական մթնոլորտ ստեղծել նաև սպորտում, մինչդեռ մարզաշխարհը չի ճանաչում ազգություն, կրոն, կտրականապես ժխտում է ռասիզմը։ Մրցումների ժամանակ բոլորը մարզիկ են։ Կարծում ենք շատերը կհամաձայնեն, որ ազգամիջյան լարվածություն սերմանող մարզիկները, մարզիչները պետք է խստագույնս պատժվեն, միջազգային ֆեդերացիաների, մրցումների կազմակերպիչների, ինչու չէ նաև միջազգային օլիմպիական կոմպիեի կողմից։ Նման մարզիկները միանգամայն արժանի են ցմահ որակազրկման։ Բելգրադում տեղի ունեցածը հերթական ապտակն էր սպորտին։ Այո, շատերի համար պաշտոնական արարողությանը բժշկին ուղարկելը նույնիսկ ծիծաղելի է, բայց․․․։
Տեղի ունեցածը պետք է համապատասխան արձագանքի արժանանա ոչ միայն մրցաշարի կազմակերպիչների և ըմբշամարտի միջազգային ֆեդերացիայի կողմից։ Հակառակ դեպքում ստիպված կլինենք արձանագրել, որ սպորտային գերատեսչություններն ուղղակիորեն արդարացնում են ադրբեջանական սպորտը ոտնահարող մառազմը։ Ինչևէ, օգտվելով առիթից անհրաժեշտ ենք համարում շնորհակալություն հայտնել Վազգեն Թևանյանին մեր երկրի պատիվը բարձր պահելու համար, մեր օրհներգը մեծ մրցաշարում հնչեցնելու և պետական դրոշը բարձրացնելու համար։ Բոլորիս համար այս ծանր օրերին նման հաղթանակներն անհրաժեշտ են օդի ու ջրի պես։
