Այսօր Ռուսաստանի վարչապետ Վլադիմիր Պուտինը հարցազրույց է տվել գերմանական Sueddeutsche Zeitung թերթին, որտեղ Եվրամիությանն առաջարկել է ստեղծել ընդհանուր տնտեսական գոտի` Լիսաբոնից մինչև Վլադիվոստոկ: Պուտինը պատրաստվում է այս օրերին մասնակցել գերմանական ընկերությունների ղեկավարների տնտեսական ֆորումին, և նրա հարցազրույցը եղել է այդ առիթով: Նրա խոսքերով` ճգնաժամը ցույց է տվել, որ ԵՄ-ը և Ռուսաստանը շատ խոցելի են: Ռուսաստանը շարունակում է կախվածության մեջ լինել հումքի շուկայից: Իսկ Եվրոպայի խնդիրներից է տնտեսության դեինդուստրիալիզացիան, ինչը հանգեցրել է շուկայում ԵՄ-ի դիրքերի կորստին, այդ թվում նաև բարձր տեխնոլոգիաների շուկայում:
Որպեսզի այս իրավիճակը փոխվի, Պուտինն առաջարկում է օգտագործել երկու կողմերի առավելությունները: Ռուսաստանը Եվրոպային կարող է առաջարկել հումք, ներդրումային կապիտալ, նոր տեխնոլոգիաներ: Բացի այդ, վարչապետը նշել է, որ Ռուսաստանը հպարտանում է իր քաղաքացիների հնարավորություններով: Որպեսզի ավելանա Եվրոպայի մրցունակությունը, Պուտինն առաջարկել է ԵՄ-ին մաքսային համակարգերի միավորում: Դա արագացնելու համար ԵՄ-ին անհրաժեշտ է նպաստել Ռուսաստանի` Առևտրի միջազգային կազմակերպությանը անդամակցելուն:
Բացի այդ, Պուտինն առաջարկել է մեխանիզմներ ստեղծել արտադրությունների համատեղ կառավարման համար:
Պուտինը նաև անդրադարձել է վիզային ռեժիմի վերացմանը. նա առաջարկել է կոնկրետ ժամկետներ առաջարկել վիզաների վերացման համար:
