«Առաջին լրատվական»-ի զրուցակիցն է «Ժողովրդավարական հայրենիք» կուսակցության նախագահ Պետրոս Մակեյանը։
– Պարոն Մակեյան, ՀՀ նախկին վարչապետ Կարեն Կարապետյանը ևս Նիկոլ Փաշինյանին հեռանալու կոչ է արել։ Ավելի վաղ նա հանդիպել էր 17 ուժերի միասնական թեկնածու Վազգեն Մանուկյանի հետ։ Ի՞նչ է, Ձեր կարծիքով, սա նշանակում, արդյոք կարո՞ղ ենք խոսել նաև ռուսական աջակցության մասին։
– Սա սկսված գործընթացի շարունակությունն է։ Տվյալ դեպքում ռուսական կենտրոնից Նիկոլին ասում են, որ նա պետք է մնա ու կատարի կապիտուլյացիոն փաստաթղթով նախանշած դրույթները, իսկ մյուս կողմից հրահրում են իրենց ընդդիմությանը՝ 17 պլյուս-մինուս մեկ կուսակցություններին, ու փողոցային գործընթացները։ Պարբերաբար նրանց են միանում նաև Հայաստանի ու Սփյուռքի մտավորականներ, կաթողիկոսներ ու փուլ առ փուլ կրակը թեժացնում են։
Հիմա Կարեն Կարապետյանի՝ գործընթացի մեջ ներքաշվելը այս ողջ պրոցեսի շարունակությունն է։ Սա էլի է շարունակություն ունենալու, ու նպատակն է երկիրը վերածել անկառավարելի քաոսի։ Այն, ինչ ուզում է Ադրբեջանը, ռուսի ձեռքով ու բարի կամքով ստանում է։ Ցավոք, այսօրվա ամբողջ քաոսը 30 տարի նույն կենտրոնից տարվող քաղաքականության հետևանքով է։ Սրա մեղավորը մենք ենք, որ անընդհատ, հայտնի մարդու ասածի նման, ռուսի սապոգը լիզել ենք։ Հիմա մենք շատ վտանգավոր իրավիճակում ենք, անդունդի հատակին ենք ու պետք է ելքեր գտնենք։
Ցավոք, ամեն ինչ կախված է Նիկոլ Փաշինյանից, բայց նա ոչ մի քայլ չի անում ու հույս ունի, որ կարող է գործընթացները զսպել։ Բայց նա չգիտի, որ երկու կողմից խաղացնում են։ Նա պետք է անցումային կառավարություն ձևավորի, չեզոք մարդ նշանակի վարչապետ, կառավարության կազմը համաձայնեցնի բոլոր շահագրգիռ ուժերի հետ՝ այդ թվում կրեմլյան կենտրոնից ղեկավարվող ուժեր պետք է ներգրավվեն, որ այս քաոսը դադարի։ Այսպես պետք է փորձենք իրավիճակից դուրս գալ։ 40 օրը լրանում է, ինչ զինադադար է հաստատվել, բայց քաոսն ավելի է խորանում։
– Դուք կարծում եք, որ Վազգեն Մանուկյանն այդ ուժերի իրակա՞ն թեկնածուն է։
– Ես ավելի քան վստահ եմ, որ Վազգեն Մանուկյանին որպես շիրմա են օգտագործում, ու նույն Կարեն Կարապետյանը կարող է լինել այդ թեկնածուն։ Վազգեն Մանուկյանը դեմք է, որին փորձեցին ներքաշել գործընթացի մեջ, զոնդաժ անել, բայց իրական թեկնածուներն իրենք ունեն։ Դրանցից մեկը կարող է լինել Կարեն Կարապետյանը։ Այս բոլոր զարգացումները հաշվի առնելով՝ Նիկոլն ինքը պետք է քայլ անի։ Գոնե մի անգամ նա պետք է ազգանպաստ, երկիրը փրկելու քայլ անի։ 17-ն ասում է՝ հայրենիքի փրկության շարժում, բայց հայրենիքն իրենք են հասցրել կազմաքանդման։ Նիկոլն ուղղակի մտավ այդ բեռի տակ ու ծնկի եկավ։
– Երբ ասում եք՝ չեզոք ինչ-որ մեկին առաջադրի վարչապետ, իր թիմի՞ց նկատի ունեք։
– Նախկինում ասում էի՝ իր թիմից ում ցանկանա, բայց հիմա առճակատումն այնքան խորացավ, որ նա պետք է փորձի չեզոք թեկնածու գտնել։ Այնպիսի մեկը, ով ընկալելի լինի բոլոր խաղացողների համար։ Թեկուզ Կրեմլը պետք է հանդուրժի այդ թեկնածոին, հակառակ դեպքում այս քաոսը, փողոցային շարժումը ավելի կխորացվի։ Նման մարդիկ Հայաստանում կան, բայց ճիշտ կլինի՝ անկուսակցական, տեխնոկրատ, հնարավորինս ընկալելի մարդ լինի բոլորի համար, լինի «Իմ քայլի» պատասխանատուն ԱԺ-ում, որպեսզի այս 5-6 ամսվա ընթացքում քաոսից դուրս գանք ու անցկացնենք արտահերթ ընտրություններ։
