Սոցիոլոգ Ահարոն Ադիբեկյանը մամուլի ասուլիսի ժամանակ հայտարարեց, որ երբ ասում են, թե ընտրությունների ժամանակ ձայները վաճառված են, լրիվ ճշմարտությունը չեն արտացոլում: Ըստ Ահարոն Ադիբեկյանի` ծախսերն արվում են մինչ այդ: «Դա քարոզարշավն է, այս կամ այն կուսակցությունը համայնքում ջրի ոռոգման, լույսի, կոմունալ հարցերն է լուծում, ասֆալտապատում է անում: Օրինակ` Երևանի ամենալուսավոր փողոցը մեր փողոցն է` Նոր Արեշի 12 փողոցը: Հիսուն մետրի վրա տասը լամպ են վառում, որովհետև կողքը դեսպանատան շենք կա, փողոցը լավ լուսավորվում է, և բնակիչներն էլ բավարարված են, քանի որ վերաբերմունք կա: Այդ առումով գտնում ենք, որ երեք իշխանական կուսակցությունները`ՀՀԿ-ն, ԲԿՆ-ն և ՕԵԿ-ը, որոնք խարսխված են ադմինիստրատիվ ռեսուրսի վրա, շանսեր ունեն անցնելու Ազգային ժողով»,- ասաց Ահարոն Ադիբեկյանը: Նա կանխատեսում է, որ Ազգային ժողովում տեղեր կստանան նաև ՀՅԴ-ը, «Ժառանգությունը», Հայ ազգային կոնգրեսը: Ի տարբերություն վարչական ռեսուրսի, ըստ Ադիրբեկյանի, այս կուսակցություններն ունեն մարդկային ռեսուրսներ: Նա հիշեցրեց, որ Դաշնակցությունն ունի նաև համայնքապետեր և ֆինանսական հնարավորություններ ու կապեր: Ահարոն Ադիբեկյանը հիշեցրեց նաև, որ 675 համայնքապետ Հանրապետական կուսակցության անդամ են, մոտ 100-ը`«Բարգավաճ Հայաստանն» ունի, ՕԵԿ-ը ունի մի քանի տասնյակ համայնքապետ: Իսկ ահա մյուս կուսակցությունները տեղական ինքնակառավարման մարմիններում ներկայացված չեն, հետևաբար, ըստ Ահարոն Ադիբեկյանի, չեն կարող վարչական ռեսուրսը գործի դնելով ձայներ բերել: Ահարոն Ադիբեկյանը կանխատեսեց, որ «Ժառանգությունը» Ազգային ժողովում կհայտնվի Րաֆֆի Հովհաննիսյանի վարկանիշի շնորհիվ, Հայ ազգային կոնգրեսն ունի շատ համակիրներ, իսկ Դաշնակցության վարկանիշը պայմանավորված է՝ հայ-թուրքական հարաբերություններին դեմ արտահայտվելով: