Ղրղզստանում դեկտեմբերի 15-ին մեկնարկել է նախընտրական քարոզչական ժամանակաշրջանը: Երկրի նախագահի վաղաժամկետ ընտրություններին, որոնք նշանակված են հունվարի 10-ին, կմասնակցի 18 թեկնածու: Ղրղզստանի Կենտրոնական ընտրական հանձնաժողովի (ԿԸՀ) կողմից հաստատված օրացուցային պլանի համաձայն, դեկտեմբերի 14-ի կեսգիշերին ավարտվել է նախագահի պաշտոնի թեկնածուների գրանցման գործընթացը, դեկտեմբերի 15-ից սկսվում է նախընտրական քարոզչությունը: Ղրղզստանում նախընտրական քարոզչությունը կավարտվի քվեարկությունն սկսվելուց մեկ օր առաջ՝ հունվարի 9-ին ժամը 08:00-ին (Երեւանի ժամանակով 06:00-ին):
Հանրապետության ԿԸՀ-ի կողմից գրանցվել է 18 թեկնածու: Նրանց թվում է Սադիր Ժապարովը, որը երկրում իշխանության էր եկել խորհրդարանական ընտրությունների արդյունքների դեմ հոկտեմբերյան բողոքներից եւ այնուհետեւ բռնկած անկարգություններից հետո: Նախագահի ընտրություններին մասնակցելու համար նա նոյեմբերի 14-ին վայր դրեց պետության ղեկավարի ժամանակավոր պաշտոնակատարի լիազորությունները եւ դադարեցրեց վարչապետի պարտականությունների կատարումը: Բացի այդ, պետության ղեկավարի պաշտոնին հավակնում են Ազգային անվտանգության պետական կոմիտեի նախկին ղեկավար Աբդիլ Սեգիզբաեւը, «Բութուն Ղրղզստան» («Միասնական Ղրղզստան») ընդդիմադիր քաղաքական կուսակցության առաջնորդ Ադահան Մադումարովը, մյուս ընդդիմադիր կուսակցության՝ «Ռեֆորմա»-ի ղեկավար Կլարա Սոորոնկուլովան, խորհրդարանի նախկին խոսնակ Կանատ Իսաեւը եւ ներքին գործերի նախկին փոխնախարար Կուրսան Ասանովը:
Դեկտեմբերի 11-ին Ղրղզստանի նախագահի պաշտոնակատար Թալանտ Մամիտովն օրենք է ստորագրել հանրապետությունում կառավարման ձեւի որոշման շուրջ հանրաքվե անցկացնելու մասին: Ընդունված օրենքով նախատեսվում է հունվարի 10-ի հանրաքվեի անցկացում՝ վաղաժամկետ նախագահական ընտրությունների հետ միաժամանակ, հաղորդել է «Ինտերֆաքս»-ը: