ԱՄՆ Կոնգրեսի Ներկայացուցիչների պալատն ու Սենատը հավանություն էր տվել Թուրքիայի դեմ պարտադիր պատժամիջոցներ կիրառելու նախաձեռնությանը՝ ռուսական C-400 զենիթահրթիռային ՀՕՊ համակարգերի գնման կապակցությամբ, գրում է ermenihaber-ը:
Այս նախաձեռնությունը երկրի պաշտպանական բյուջեի օրինագծի մի մասն է, որը նախատեսված է 2021 ֆինանսական տարվա համար (սկսվել է հոկտեմբերի 1-ին):
ԱՄՆ նախագահ Դոնալդ Թրամփը անդրադառնալով թեմային, հայտնել է, որ վետո է կիրառելու այդ օրինագծի դեմ։
Թրամփը Twitter-ում կատարած գրաման մեջ մասնավորապես նշել է․
«Պաշտպանական նոր օրինագծից ամենաշատ օգտվողը Չինաստանն է։ Օրինագծի դեմ վետո եմ կիրառելու»։
Նշենք, որ եթե Թրամփը վետո դնի, ապա Սենատը կրկին նիստ կգումարի և քվերակության կդնի օրինագիծը։ Հաստատվելու դեպքում պատժամիջոցներն ուժի մեջ կմտնեն:
Թուրքիայի և Ռուսաստանի միջև C-400-ների պայմանագիրը ստորագրվել է 2017թ.-ին։ Առաջին խմբաքանակը Թուրքիա մատակարարվեց 2019թ. հուլիսին։ Ռուս-թուրքական գործարքը լուրջ ճգնաժամ էր առաջացրել թուրք-ամերիկյան հարաբերություններում։
«CAATSA» օրինագծով նույնիսկ նախատեսվում է սահմանափակել ամերիկյան զենքի վաճառքը Թուրքիային և կոչ է արվում պատժամիջոցներ կիրառել թուրք բարձրաստիճան պաշտոնյաների նկատմամբ:
