Վրաստանի պաշտպանության նախկին նախարար, «Վրացական կուսակցություն» նոր ընդդիմադիր կուսակցության համահիմնադիր Իրակլի Օկրուաշվիլին չի բացառել քաղաքացիական դիմակայությունը Վրաստանում: «Մենք չենք ցանկանում գնալ առճակատման ճանապարհով, բայց դրանից խուսափել չի լինի: Մենք չենք ցանկանում այնպիսի պայքար, որը մեզ կբերի քաղաքացիական դիմակայության, բայց դա անխուսափելի է:
Մենք չենք պատրաստվում պայքարել ճերմակ ձեռնոցներով»,- հայտարարել է Օկրուաշվիլին, հայտնում է Новости-Грузия-ն:
Երեկ «Վրացական կուսակցության» հիմնադիր համագումարի տեսաուղերձում վրաց ընդդիմադիրը նշել է, որ նոր կուսակցության ղեկավարները չեն առաջնորդվում ռեւանշիստական նկատառումներով: «Միայն մի կողմ դնելով անձնական հավակնությունները` մենք կարողացանք միավորվել:
Դրան հասնելու համար մենք դժվարին ճանապարհ անցանք»,- ասել է Օկրուաշվիլին: Նրա խոսքերով` երկրի ներկայիս իշխանության դեմ պայքարելուն նախապատրաստվելու համար կպահանջվի մի քանի ամիս. «եկող տարվա աշնանը մենք պետք է պատրաստ լինենք ամեն ինչին»:
Նոր քաղաքական կազմակերպությունը ստեղծել են Վրաստանի պաշտպանության նախկին նախարար Իրակլի Օկրուաշվիլին, նախկին ժողովրդական պաշտպան Սոզար Սուբարին, Ռուսաստանում Վրաստանի նախկին դեսպան եւ երկրի առաջատար հեռուստաընկերություններից մեկի` «Ռուսթավի-2»-ի հիմնադիր Էրոսի Կիցմարիշվիլին, «Պաշտպանիր Վրաստանը» հասարակական շարժման առաջնորդ Լեւան Գաչեչիլաձեն եւ շարժման անդամ Կոկա Գունցաձեն: