«Ամերիկայի Ձայն»-ի հայկական ծառայության փոխանցմամբ՝ ԱՄՆ-ի Սենատում օգոստոսի 2-ին Թուրքիայում դեսպանի պաշտոնում Ֆրենսիս Ռիկիարդոնեի հաստատման լսումների ժամանակ, ԱՄՆ-ի նախագահ Բարաք Օբամայի կողմից նշանակված՝ այդ երկրում դեսպանի պաշտոնավարման լրիվ ժամկետին հավակնող Ռիկարդոնեն խուսափել է Հայոց ցեղասպանության շուրջ ԱՄՆ-ի քաղաքականության մասին սենատոր Մենենդեսի կողմից առաջարկված հարցերին ուղիղ պատասխան տալուց։
Բացի այդ, Ռիկիարդոնեն թույլ բացատրություն է ներկայացրել Թուրքիայի ներկայիս սահմաններում գոյություն ունեցող քրիստոնյա համայնքների իրավունքների և բարեկեցության վերաբերյալ սենատորների կողմից արտահայտված մտահոգություններին:
Այս մասին հաղորդագրություն է տարածել Ամերիկայի Հայ դատի գրասենյակը, որի գործադիր տնօրեն Արամ Համբարյանն ասել է, որ Նյու Ջերսիի և ԱՄՆ-ի այլ մասերում բնակվող ամերիկահայերը բարձր են գնահատել սենատոր Մենենդեսի առաջնորդություն ու վճռականությունը՝ դեսպան Ռիկիարդոնեից պատասխաններ ակնկալելու և Հայոց ցեղասպանության հարցի շուրջ ԱՄՆ կառավարությունից ազնվություն պահանջելու գործում:
Համբարյանը նշել է. «Ցավոք, այսօր կրկին ականատեսը դարձանք, թե ինչպես երկրի դիվանագիտության բարձրագույն ներկայացուցիչներից մեկը կրկին դիմել է բառախաղի՝ բացահայտ ճշմարտությունն անվանելուց խուսափելու նպատակով։ Ճշմարտությունն ապրանք չէ, և մարդու իրավունքները չեն վաճառվում. Ամերիկան չպետք է վաճառի, կամ, ինչն ավելի վատ է՝ օտարերկրյա պետության ճնշման տակ հրաժարվի ցեղասպանության նկատմամբ իր ունեցած դիրքորոշումից»: