Կորոնավիրուսի հետևանքով մի քանի ամիս արգելվեց ռեստորանների ու սրճարանների գործունեությունը, ինչը հանգեցրեց մի շարք խնդիրների, դժվարությունների։ Օգոստոս-սեպտեմբեր ամիսներին ոլորտը կարծես սկսում էր նոր շունչ առնել, վրա հասավ պատերազմը։
Ի՞նչ է կատարվում ռեստորանային ոլորտում այս օրերին․ «Առաջին լրատվական»-ի հարցին Ռեստորանների հայկական միության գործադիր տնօրեն Վահե Գևորգյանը պատասխանեց․ «Նախ՝ ես կուզեի ասել, որ չնայած բարոյահոգեբանական ծանր իրավիճակին, կարծում եմ, որ պետությունը պետք է շարունակի գոյություն ունենալ, և այդ բիզնեսը, որը պետության ստնտուներից մեկն է, պետք է կարողանա հաղթահարել այդ բարոյահոգեբանական ճգնաժամը և փորձել նոր խնդիրներ իր առաջ դնել ու հասնել այդ խնդիրների լուծմանը՝ ի շահս Հայաստանի պետականության։
Ճիշտ է՝ պատերազմական շրջանն ամենաողբերգական հատվածն էր, բայց մինչ այդ էլ ոլորտը բավականին ծանր տարի ունեցավ, որովհետև ձմեռվա ցածր արդյունավետության սեզոնից հետո 2020 թվականի մարտից արդեն սկսվեց կորոնավիրուսային ճգնաժամը, և այն հոսքերը, որոնք սպասվում էին, բոլորովին կրճատվեցին առաջին մի քանի ամիսներին։ Ոլորտն ունեցավ մինչև 80-90 տոկոս անկում, և մոտ երկու ամիս ոլորտը չէր աշխատում։ Ի պատիվ մեր ոլորտի ձեռնարկատերերի, պետք է ասեմ, որ նրանք հիմնականում աշխատեցին պահպանել աշխատատեղերի մեծ մասը և բիզնեսները, որպես այդպիսին։ Իհարկե, եղան նաև ցավալի դեպքեր, երբ ոլորտի մի շարք ընկերություններ փակվեցին, բայց հիմնականում կորոնավիրուսային ճգնաժամից ոլորտը, կարծում եմ՝ դուրս եկավ բավականի պատվով ու պատվախնդրորեն։ Իհարկե, իրագործվեցին նաև կառավարության որոշ ծրագրեր։ Գուցե այդ ծրագրերը կարող էին լինել ավելի արդյունավետ, բայց այդ պահին դրանք ինչ-որ առումով օգնեցին ոլորտին ու թեթևացրեցին բեռի որոշ մասը»։
Մանրամասները՝ տեսանյութում։