«Առկա են մեծ անորոշություններ, որոնք տարբեր ճգնաժամերով են պատված՝ քաղաքական, հումանիտար, բարոյահոգեբանական և սոցիալ-տնտեսական»,- հետպատերազմյան շրջանում տնտեսությունում տիրող իրավիճակի շուրջ «Առաջին լրատվական»-ի հետ զրուցում այս մասին ասաց ԵՊՀ տնտեսագիտության ֆակուլտետի դեկան, տնտեսագիտության դոկտոր Հայկ Սարգսյանը: Նրա դիտարկմամբ՝ սոցիալ-տնտեսական ճգնաժամը չի հաղթահարվի, եթե մյուս ճգնաժամերը չհաղթահարվեն:
«Շատ կարևոր է, որ ետպատերազմյան ճգնաժամերը հաղթահարվեն առանց պայթյունների՝ առանց լուրջ բախումների, և դա հանգեցնի նոր իշխանության, որը կկարողանա հանգուցալուծել կուտակված խնդիրները: Մենք պետք է կարողանանք անվտանգային ու կայունության հիմնախնդիրներ լուծել, որպեսզի սոցիալ-տնտեսական խնդիրները ունենան բավարար լուծումներ»,- նշեց Սարգսյանը:
ԵՊՀ նորարարության և տնտեսագիտության ամբիոնի վարիչ, տնտեսագիտության դոկտոր Աշոտ Մարկոսյանի դիտարկմամբ՝ շատ կարևոր է հասարկության վերաբերմունքը պատերազմի արդյունքներին: «Ամենակարևոր խնդիրներից մեկն այն է, թե պատերազմն ինչ ազդեցություն է թողել մեր տնտեսության վրա, որովհետև վաղվա մյուս օրվա ծրագրերը կազմելիս, պետք է հասկանալ, թե ինչ իրավիճակում է գտնվում տնտեսությունը: Մենք պետք է հստակ պատկերացում ունենանք պատերազմի բերած վնասների չափերի վերաբերյալ, որովհետև տնտեսության հետագա զարգացումը կապված է այդ դժվարությունների հաղթահարմամբ: Առաջիկա զարգացման համար զգալի միջոցներ ու ռեսուրսներ են պետք և ազգային անվտանգության տեսանկյունից պարտավոր ենք ռիսկերը հաշվի առնել»,- նշեց Մարկոսյանը:
Մանրամասն՝ տեսանյութում:
