Հարավային Կովկասում ԵՄ հատուկ ներկայացուցիչ Պիտեր Սեմնեբին «Коммерсант» թերթին տված հարցազրույցում իր դիտարկումներն է հայտնել ԼՂ հակամարտության, ինչպես նաեւ Հայաստանում ռուսական բազայի տեղակայման ժամկետը 49 տարով երկարացման մասին համաձայնագրին: Լրագրողի հարցադրմանը, թե հնարավոր է ռազմաբազայի տեղեկայման ժամկետի երկարացումը հետաձգի ԼՂ հակամարտության կարգավորումը, Սեմնեբին պատասխանել է. «Ողբերգական կլիներ, եթե ղարաբաղյան հակամարտությունը չլուծվեր եւս 40 տարի: Այն արդեն շատ երկար է շարունակվում եւ վտանգ է պարուրում տարածաշրջանի երկրների համար, հարեւան երկրների համար, քանի որ այդ հակամարտությունը վակուումում է գտնվում: Ջանքեր է պետք գործադրել այն լուծելու համար: Անհրաժեշտ է ամրապնդել շփման գիծը, որտեղ վերջին ժամանակներս փոխհրաձգությունների ու միջադեպերի ականատեսն ենք լինում: Զինադադարը, իհարկե, չի լուծում խնդիրները, սակայն այն խթանում է բանակցային գործընթացի կարգավորմանը», – ասել է Սեմնեբին:
ԵՄ ներկայացուցիչը մեկնաբանել է նաեւ ՌԴ ռազմաբազայի տեղակայման ժամկետը Հայաստանում երկարացնելու մասին որոշումը: Նրա խոսքերով, ԵՄ պաշտոնական դիրքորոշումը կայանում է նրանում, որ դա երկու երկրների ներքին գործն է: «Դա Ռուսաստանի եւ հայաստանի երկկողմ հարցն է: Մեզ, իհարկե, այդ հարցը հետաքրքրում է, եւ կարծում եմ՝ այսօր անհրաժեշտություն կա խորհրդակցել տարբեր կողմերի հետ եւ համոզել հարեւան երկրներին, որ այդ համաձայնագիրը չի սպառնում իրենց», – ասել է Սեմնեբին: